Thursday, May 7, 2020

DFR.. The inspiring personality!

ಗಾಬರಿಯಿಂದ ಬಡ ಬಡ ಅಂತ ಬಾಗಿಲು ಬಡಿಯುತ್ತಿದ್ದಳು.. ಸೆಕ್ಯೂರಿಟಿ ಕಣ್ಣುಜ್ಜಿಕೊಂಡು.. 

:ಯಾರಮ್ಮ, ಏನಮ್ಮ.. ಯಾಕಮ್ಮ "

ವಿಚಿತ್ರವಾದರೂ ಕೇಳಿದ ಪ್ರಶ್ನೆಗಳೆಲ್ಲಾ ಆ ಹೊತ್ತಿಗೆ  ಸರಿ ಇತ್ತು.. 

"@#@#@#@#@# ನಂಬರ್ ಗೆ ಫೋನ್ ಮಾಡಿ.. ಅವರನ್ನ ಅರ್ಜೆಂಟಾಗಿ ನೋಡಬೇಕಿತ್ತು.." 

"ಮೋ.. ಈಗ ಘಂಟೆ ನೋಡಿದ್ದೀರಾ.. ಆಗಲೇ ಮಧ್ಯ ರಾತ್ರಿ ಎರಡು ಘಂಟೆ.. ಇಷ್ಟು ಹೊತ್ತಿನಲ್ಲಿ ಯಾರಮ್ಮ.. ಏನಮ್ಮ.. ಯಾಕಮ್ಮ"

"ಸರ್ ... ನನ್ನ  ಕತೆ ಈಗ ನಿಮಗೆ ಹೇಳೋಕೆ ಆಗಲ್ಲ..  ಅವರನ್ನು ಕರೆಯಿರಿ.. ನನ್ನನ್ನ ಒಳಗೇನು ಬಿಡಬೇಡಿ.. ನನ್ನ ಮೊಬೈಲ್ ಕರೆನ್ಸಿ ಖಾಲಿಯಾಗಿದೆ"

ಗೊಣಗಿಕೊಂಡೆ.. ಹಚ್ಚಿದ್ದ ಬೀಡಿಯನ್ನು ಬಿಸಾಕಿ.. ಇಂಟೆರ್ ಕಾಮ್ ಫೋನ್ ತೆಗೆದುಕೊಂಡು ಮೂರು ನಂಬರ್ ಒತ್ತಿದ.. ಒಂದಷ್ಟು ಹೇಳಿದ.. ಹೆಸರನ್ನು ಹೇಳಿದ.. 

"ಸರಿ ಕಣಮ್ಮ .. ಹತ್ತು ನಿಮಿಷ ಬರ್ತಾರಂತೆ.. ಇಲ್ಲಿಯೇ ಕೂತುಕೊಳ್ಳಿ.. ಹೊರಗೆ ವಿಪರೀತ ಚಳಿ ಇದೆ"... ಮೇ ತಿಂಗಳಾಗಿದ್ದರೂ ಕಳೆದ ಕೆಲವು ದಿನಗಳ ಮಳೆ ವಾಣಿಜ್ಯ ನಗರಿಯನ್ನು ಚಳಿಯ  ಕಡಲಿಗೆ ದೂಡಿತ್ತು.. 

"ಯಸ್.. ಹಾಯ್.. ಏನು ಮೇಡಂ ನೀವು ಈ ಹೊತ್ತಿನಲ್ಲಿ.. ಏನಾಯ್ತು"

ಬಂದಾಕೆ ಹಾಗೆ ಅಳುತ್ತಾ.. ಇವರನ್ನು ಹಗ್ ಮಾಡಿ.. "ಬನ್ನಿ ನನ್ನ ಜೊತೆ ಹೇಳುತ್ತೇನೆ.. "

"ಓಹ್.. ಸರಿ.. ಒಂದು ಹತ್ತು ನಿಮಿಷ... ಮನೇಲಿ ಹೇಳಿ... ಕಾರು ತೆಗೆದು ಬರುತ್ತೀನಿ.. "

"ಮೇಡಂ.. ಕಾರು ನನ್ನದೇ ಇದೆ.. ಇಲ್ಲಿಂದಲೇ ಕರೆ ಮಾಡಿ..  " ಎನ್ನುತ್ತಾ ಸೆಕ್ಯುರಿಟಿಯ ಫೋನ್ ಕಿತ್ತುಕೊಂಡು.. "ರೀ.. ಮನೇಲಿ ಇಷ್ಟು ಹೊತ್ತಿಗೆ ಮಲಗಿರ್ತಾರೆ.. ಇಂಟೆರ್ ಕಾಂ ಕರೆ ಸರಿ ಹೋಗಲ್ಲ." ಎಂದು ಹೇಳಿ.. ಫೋನಿನಲ್ಲಿ ವಿಷಯ ಹೇಳೋಕೆ ಸಿದ್ಧ ಮಾಡಿ.. ಅವರನ್ನು ಅಕ್ಷರಶಃ ತೋಳು ಹಿಡಿದುಕೊಂಡೆ ತಮ್ಮ ಕಾರಿನತ್ತ ಕರೆದೊಯ್ದರು.. 

ಮುಂದಿನ ಹತ್ತು ನಿಮಿಷ.. ಇಬ್ಬರೂ ಕಾರಲ್ಲಿ ಹೊರಟರು.. 

ಕಣ್ಣು ಒರೆಸಿಕೊಳ್ಳುತ್ತಲೇ ಆಕೆ ಡ್ರೈವ್ ಮಾಡುತ್ತಿದ್ದಳು.. ವಿಷಯ ಬರಲಿ ಅಂತ ಈಕೆಯೂ ಆ ಕತ್ತಲಿನ ರಸ್ತೆಯನ್ನು ನೋಡುತ್ತಾ ಕುಳಿತಿದ್ದರು.. 

ಸುಮಾರು ಒಂದು ಘಂಟೆ ಡ್ರೈವ್ ಆದ ಮೇಲೆ.. ಊರಿನ ಆಚೆ ಇದ್ದ ದೊಡ್ಡ ಬಂಗಲೆಯ ಒಳಗೆ ನುಗ್ಗಿತು.. 

"ಬನ್ನಿ ಮೇಡಂ.. ಸಾರಿ ಏನು ಮಾತಾಡಲಿಲ್ಲ.. ಬೇಸರ ಬೇಡ.. ಬನ್ನಿ ಒಳಗೆ.. "

ಸದಾ ಶಾಂತ ಮೂರ್ತಿಯಾಗಿದ್ದ ಇವರಿಗೆ ಕೋಪ ಬಂದರೂ ಒಳಗೆ ನುಂಗಿಕೊಂಡು .. ಏನೋ ವಿಷಯ ಇದೆ.. ಇಲ್ಲದೆ ಇದ್ದರೇ ಈ ರೀತಿ ಇಷ್ಟು ಹೊತ್ತಿಗೆ ಕರೆಯುತ್ತಿರಲಿಲ್ಲ ಎಂದು  ಆಕೆಯ ಬಗ್ಗೆ ಗೊತ್ತಿದ್ದರಿಂದ ಸುಮ್ಮನೆ ಒಳನೆಡೆದರು. 

ಒಳಗೆ ಹೋದರೆ.. ಇವರಿಗಿಷ್ಟವಾದ ಬಿಸಿ ಬಿಸಿ ಸ್ಟ್ರಾಂಗ್  ಕಾಫೀ ಕೊಟ್ಟರು... 

ಸರಿ ಬಂದದ್ದು ಆಗಿದೆ.. ಆಗಿದ್ದು ಆಗಲಿ ಅಂತ ಬಿಸಿ ಬಿಸಿ ಕಾಫೀ ಕುಡಿದಾಗ.ಆ ತಣ್ಣನೆಯ ವಾತಾವರಣಕ್ಕೆ ಕಾಫೀ ಅಮೃತವಾಗಿತ್ತು.. !

"ಮೇಡಂ.... ಇವಳು ನನ್ನ ತಂಗಿ ಮೀನಾ.. ಇವಳು ಆಫೀಸ್ ಇಂದ ಮನೆಗೆ ಬರುವಾಗ .. ಯಾರೋ ಇವಳ ಹತ್ತಿರ ಬಂದು ಪರ್ಸ್ ಕಿತ್ತುಕೊಂಡು ಹೋಗಿದ್ದರು.. ಇವಳು ಪೊಲೀಸ್ ಸ್ಟೇಶನ್ನಿಗೆ ಹೋದರೆ ಸುಮ್ಮನೆ ಗೋಳಾಡಿಸುತ್ತಾರೆ ಅಂತ ಹೋಗಿಲ್ಲ.. ಈಗ ಸಂಜೆ.. ಪೊಲೀಸ್ ಸ್ಟೇಷನಿಂದ ಕರೆ ಬಂದಿತ್ತು.. ನಿಮ್ಮ ವಸ್ತುಗಳು ಒಂದು   ಮರದ ಹತ್ತಿರ ಬಿದ್ದಿತ್ತು.. ಅದರ ಪಕ್ಕ ಮಳೆಯಲ್ಲಿ ನೆಂದು ತೊಪ್ಪೆಯಾಗಿದ್ದ ವ್ಯಕ್ತಿಯೂ ಬಿದ್ದಿದ್ದನು .. ನೀವು ಕೂಡಲೇ ನಿಮ್ಮ ಮನೆ ಹತ್ತಿರ ಇರುವ ಸ್ಟೇಷನಿಗೆ ಬನ್ನಿ.. ಅಂತ ಹೇಳಿದರು. ನಮಗೆ ಏನೂ ತೋಚದೆ.. ನಿಮ್ಮ ನೆನಪು ಬಂತು.. ಅದಕ್ಕೆ ಕಷ್ಟವಾದರೂ ಸರಿ.. ದೂರವಾದರೂ ಸರಿ ಎಂದು ಈ ಅವೇಳೆಯಲ್ಲಿ ಬಂದೆ.. ಸಾರಿ ಮೇಡಂ.. ನಮಗೆ ನೀವೇ ದಾರಿ ತೋರಿಸಬೇಕು.. ನಮಗೆ ಪೊಲೀಸ್ ಸ್ಟೇಷನ್, ಪೊಲೀಸು ಅಂದ್ರೆ ಭಯ.. ಅದಕ್ಕೆ  ನನ್ನ ಅಪ್ಪ, ಅಮ್ಮ, ದೊಡ್ಡಪ್ಪ, ದೊಡ್ಡಪ್ಪ, ಅಜ್ಜ ಅಜ್ಜಿ  ಚಿಂತೆಯಿಂದ ನಿದ್ದೆ ಮಾಡಿಯೇ ಇಲ್ಲ.. ನೋಡಿ ನೋಡಿ ಎಲ್ಲರೂ ನಿಮ್ಮನ್ನೇ ಕಾಯುತ್ತಿದ್ದಾರೆ.." ಅಂದದ್ದೇ ತಡ.. ರೂಮಿನಲ್ಲಿದ್ದ ಒಂದು ಕುಟುಂಬವೇ ಹಾಲಿಗೆ ಬಂದು ಕೈ ಮುಗಿದವು ಇವರಿಗೆ..

ಕಾಫೀ ಮುಗಿದಿತ್ತು .. ಕಾಫೀ ಪ್ರಿಯೆ ಆಗಿದ್ದ ಇವರಿಗೆ ತನಗೆ ಪರಿಚಯವಿದ್ದ ಸಂಜನಾ ಹೇಳಿದ್ದು ಕೇಳುತ್ತ ಇದ್ದದ್ದರಿಂದ ಕಾಫೀ ರುಚಿ ಹತ್ತಿರಲಿಲ್ಲ.. "ಸಂಜನಾ.. ಇನ್ನೊಂದು ಕಪ್ ಕಾಫೀ ಹೇಳಿ.. ಸ್ವಲ್ಪ ಯೋಚಿಸೋಕೆ ಸಮಯಕೊಡಿ" ಎನ್ನುತ್ತಾ  ಹೊರಗೆ ಬಂದರು.. ತಂಪಾದ ಗಾಳಿ ಚಳಿಯನ್ನು ಹೊತ್ತು ತರುತ್ತಿದ್ದರೂ .. ಈ ಅವೇಳೆಯಲ್ಲಿ ಈ ರೀತಿಯ ವಿಚಿತ್ರ ಪ್ರಸಂಗ.. ಚಳಿಯನ್ನು ಹೊರದೂಡಿತ್ತು.. ಜೊತೆಗೆ ತನಗಿಷ್ಟವಾದ ಜಾಕೆಟ್, ಗ್ಲೌಸ್, ಟೋಪಿ ಚಳಿಯನ್ನು ತಡೆಯಲು ಸಹಾಯ ಮಾಡಿತ್ತು.. 

ಕಾಫಿ ಬಂತು.. ಕುಡಿದ ಮೇಲೆ ಹೊಸ ಚೈತನ್ಯ ಬಂತು.. "ಮೀನಾ ಗಾಬರಿ ಬೇಡ.. ಬನ್ನಿ.. ಸಂಜನಾ ನಿಮ್ಮ ಕಾರನ್ನು ನಾನೇ ಡ್ರೈವ್ ಮಾಡುತ್ತೇನೆ. ನಡೀರಿ ಹೋಗೋಣ .. ಎನ್ನುತ್ತಾ ಮನೆಯವರಿಗೆ ಧೈರ್ಯ ಹೇಳಿ.  ಬೇಗ ಬರುತ್ತೇವೆ.. ಯೋಚಿಸಬೇಡಿ ಎಂದು ಹೇಳಿ  ಹೆಬ್ಬೆರಳನ್ನು ತೋರಿಸುತ್ತಾ ಹೊರಗೆ ಬಂದರು.. 

"ಅಮ್ಮ ಮೇಡಂ ಇದ್ದಾರೆ.. ಎಲ್ಲವನ್ನು ನೋಡಿಕೊಳ್ತಾರೆ.. ಯೋಚಿಸಬೇಡಿ. .. ನನಗೂ ಅವರದ್ದೇ ಧೈರ್ಯ .. ಅದಕ್ಕೆ ಕರೆದುಕೊಂಡು ಬಂದಿದ್ದು". ಎನ್ನುತ್ತಾ ಬಾಗಿಲನ್ನು ಎಳೆದುಕೊಂಡು ಲಾಕ್ ಮಾಡಿಕೊಂಡು ಹೊರಟಳು ..  ಸಂಜನಾ.. 

ಮೀನಾ ಸಂಜನಾ ಕಾರಿನಲ್ಲಿ ಕೂತರು.. ಇವರು ಡ್ರೈವ್ ಮಾಡುತ್ತಾ ಹತ್ತಿರದಲ್ಲಿಯೇ ಇದ್ದ ಪೊಲೀಸ್ ಸ್ಟೇಷನಿಗೆ ಬಂದರು.. 

"ನಮಸ್ಕಾರ ಮೇಡಂ.. ಇದೇನಿದು ಇಷ್ಟು ಹೊತ್ತಲ್ಲಿ.. " ಅಚ್ಚರಿಯ ದನಿಯಲ್ಲಿ ಕಾನ್ಸ್ಟೇಬಲ್ ಶರಣಪ್ಪ ಕೇಳಿದರು.. 

"ನಮಸ್ಕಾರ ಶರಣಪ್ಪ ಸಾಹೇಬ್ರು ಇದ್ದಾರಾ?"

"ಇದ್ದಾರೆ ಮೇಡಂ.. ಒಳಗೆ ಹೋಗಿ.. ಯಾವುದೋ ಕೇಸು ಸ್ವಲ್ಪ ತಲೆ ಬಿಸಿ ಮಾಡ್ಕೊಂಡಿದ್ದಾರೆ"

ಒಳಗೆ ಬಂದು.."ನಮಸ್ಕಾರ ಸರ್" 

ಸಿಗರೇಟು ಸೇದುತ್ತಾ ಯಾವುದೊ ಫೈಲ್ ನಲ್ಲಿ ಮುಳುಗಿದ್ದ ಇನ್ಸ್ಪೆಕ್ಟರ್ ದನಿ ಬಂದತ್ತ ತಿರುಗಿ "ಓಹ್ ಓಹೋ ನಮಸ್ಕಾರ ಮೇಡಂ.. ಏನಿದು ಆಶ್ಚರ್ಯ ಇಷ್ಟು ಹೊತ್ತಿನಲ್ಲಿ.. ಬನ್ನಿ ಬನ್ನಿ ಕುಳಿತುಕೊಳ್ಳಿ" ಎಂದು ಕುರ್ಚಿತೋರಿಸಿ "ಸಾರಿ ಮೇಡಂ.. ರಾತ್ರಿ ಹೊತ್ತು ಈ ಚಳಿ.. ಜೊತೆಗೆ ಈ ಹಾಳಾದ ಕೇಸುಗಳು ತಲೆ ಕೆಡಿಸುತ್ತವೆ.. ಇದಿಲ್ಲ ಅಂದರೆ ತಲೆ ಓಡೋಲ್ಲ " ಎನ್ನುತ್ತಾ ಸಿಗರೇಟ್ ಆಶ್ ಟ್ರೆಗೆ ಹಾಕಿ "ಹೇಳಿ ಮೇಡಂ ಬಂದ ವಿಚಾರ"

"ನಮಸ್ಕಾರ ಸರ್.. ಇವರು ನನ್ನ ಆತ್ಮೀಯ ಗೆಳತೀ.. ನಿಮ್ಮ ಸ್ಟೇಷನಿಂದ ಕರೆ ಮಾಡಿದ್ದರಂತೆ.. ಇವರಿಗೆ ಪೊಲೀಸ್ ಅಂದರೆ ಹೆದರಿಕೆ.. ಅದಕ್ಕೆ ಸಹಾಯ ಮಾಡೋಣ ಅಂತ ಬಂದೆ.. "

"ಏನ್ ಮೇಡಂ ನಾವೇನೂ ರಾಕ್ಷಸರ.. ಇವರನ್ನು ತಿಂದು ಬಿಡ್ತೀವಾ..  ನಮಗೂ ಅಕ್ಕ ತಂಗಿಯರು ಇದ್ದಾರೆ ಮೇಡಂ" ಜೋರಾಗಿ ನಗುತ್ತ.. "ಮೀನಾ ಮೇಡಂ ಅಂದರೆ ಯಾರು? .. ಈ ಕಡೆ ಬನ್ನಿ ನಿಮ್ಮ ಪರ್ಸ್ ನೋಡಿ.. ನಿಮ್ಮದೇನಾ ಹೇಳಿ"

ಮೀನಾ ಹೆದರುತ್ತಲೇ.. ಬಂದು.. ಪುರ್ಸ್ ಮುಟ್ಟದೆ.. ಅದನ್ನು ನೋಡಿ.. ಸರ್.. ಇದು ನನ್ನದಲ್ಲ.. "

ಅಚ್ಚರಿಗೊಂಡ ಇನ್ಸ್ಪೆಕ್ಟರ್.. "ನಿಮ್ಮ ಹೆಸರಿದೆ ಮೇಡಂ ನೋಡಿ".. 

ಆಗ ಇವರು ಎದ್ದು.. " ಏನ್ ಸರ್. ನಾ ನೋಡಬಹುದೇ.. ಅವರಿಗೆ ಇನ್ನೂ ಹೆದರಿಕೆ ಹೋಗಿಲ್ಲ" 

"ಬನ್ನಿ ಮೇಡಂ.. ನೋಡಿ ಪರವಾಗಿಲ್ಲ.. ಫಿಂಗರ್ ಪ್ರಿಂಟ್ಸ್  ತರಲೆ ಏನೂ ಇಲ್ಲ.. ನೋಡಿ ಪರವಾಗಿಲ್ಲ.. .. ರೀ ಶರಣಪ್ಪ. ಒಂದು ಆರು ಸ್ಟ್ರಾಂಗ್ ಕಾಫೀ ತರಿಸ್ರಿ.. ಈ ಮೇಡಂಗೆ ಸ್ಟ್ರಾಂಗ್ ಕಾಫೀ ಅಂದ್ರೆ ತುಂಬಾ ಇಷ್ಟ" 
ಮೇಡಂ ಕಡೆ ನೋಡಿ ನಕ್ಕರು.. 

"ಸರ್ ನೀವು ಸರಿ ಇದ್ದೀರಾ " ಎನ್ನುತ್ತಾ.. ಬ್ಯಾಗ್ ತೆಗೆದುಕೊಂಡು "ಮೀನಾ ನೋಡಿ.. ನಿಮ್ಮದೇನಾ ಅಂತ"

ಬ್ಯಾಗಿನಲ್ಲಿದ್ದ ಒಂದೊಂದೇ ವಸ್ತುವನ್ನು ತೆಗೆದು ನೋಡಿದರು.. ಕ್ರೆಡಿಟ್ ಕಾರ್ಡ್, ಮೊಬೈಲ್, ಡೆಬಿಟ್ ಕಾರ್ಡ್, ಪ್ಯಾನ್ ಕಾರ್ಡ್, ಡ್ರೈವಿಂಗ್ ಲೈಸೆನ್ಸ್, ಲಿಪ್ಸ್ಟಿಕ್, ಬಾಚಣಿಗೆ, ಐ ಲೈನರ್, ಹೇರ್ ಬ್ಯಾಂಡ್, ಎಲ್ಲವನ್ನೂ ನೋಡಿದ ಮೀನಾ. ಮೇಡಂ ಇದ್ಯಾವುದು ನನ್ನದಲ್ಲ.. ಆದರೆ  ಬ್ಯಾಗ್ ಮಾತ್ರ ನನದು.. ನೋಡಿ ಕಾರ್ಡುಗಳ ಮೇಲೆ ಇರೋ ಹೆಸರು ನೋಡಿ., ಅದು  ನನ್ನದಲ್ಲ.. " ಸ್ವಲ್ಪ ಧೈರ್ಯದಿಂದ ಮೀನಾ ಉತ್ತರಿಸಿದಳು.. 

"ಮೀನಾ ಸರಿ ನೀವು ಅಲ್ಲಿ ಕುಳಿತುಕೊಳ್ಳಿ.. ನಾ ಮಾತಾಡುತ್ತೇನೆ.. " 

ಮೀನಾ ಹೋಗಿ ಕೂತರು.. ಸಂಜನಾ.. ಮೀರಾಳ ಕೈಯನ್ನು ಅದುಮಿ.. ಮೇಡಂ ಇದ್ದಾರೆ ಏನೂ ತೊಂದರೆ ಇಲ್ಲ ಅನ್ನುವ ಲುಕ್ ಕೊಟ್ಟರು.. 

ಮೇಡಂ..  ಅಲ್ಲಿದ್ದ ಕಾನ್ಸ್ಟೇಬಲ್ ಅವರನ್ನು ಕೇಳಿದರು.. ನಿಮ್ಮ ಸಾಹೇಬ್ರು ಎಲ್ಲಿ? ಶರಣಪ್ಪ ಅವರು ಇಲ್ಲ.. " 

ಅವ ಸಾಹೇಬ್ರು ಸಿಗರೇಟು ಸೇದೋಕೆ ಹೊರಗೆ ಹೋಗಿದ್ದಾರೆ.. ಶರಣಪ್ಪ ಕಾಫೀ ತರೋಕೆ ಹೋಗಿದ್ದಾರೆ.. ಅಂದರು.. 

ಸ್ವಲ್ಪ ಹೊತ್ತಿಗೆ ಇನ್ಸ್ಪೆಕ್ಟರ್ ಬಂದ್ರು.. "ಏನು ಮೇಡಂ ಏನಾದರೂ ಗೊತ್ತಾಯ್ತಾ?"

"ಸರ್.. . ನೋಡಿ ಸರ್.. ಕಾರ್ಡ್, ಮೊಬೈಲ್ ಯಾವುದು ಇವರದ್ದಲ್ಲ.. ಬರಿ ಬ್ಯಾಗ್ ಮಾತ್ರ ಇವರದ್ದು ಅಂತ ಗುರುತಿಸಿದ್ದಾರೆ.. ನೋಡಿ ಸರ್ ಬೇರೆ ಏನೋ ತರಲೆ ಇರುತ್ತೆ.. ಇವರು ಈಗ ಹೋಗಬಹುದಲ್ವಾ.. ಪಾಪ ಸರ್.. ತುಂಬಾ ಒಳ್ಳೆಯ ಕುಟುಂಬ ಇವರದ್ದು.. "

ಅಷ್ಟರಲ್ಲಿ ಕಾಫೀ ಬಂತು.. 

ಆ ಚಳಿಗೆ ಸ್ಟ್ರಾಂಗ್ ಕಾಫೀ ಹೊಸ ಉತ್ಸಾಹ ಕೊಟ್ಟಿತು ... ಜೊತೆಗೆ ಇನ್ಸ್ಪೆಕ್ಟರ್ ಸಹಜವಾಗಿಯೇ ಕೂಲಾಗಿ ಮಾತಾಡಿದ್ದರಿಂದ ಸಂಜನಾ ಮತ್ತು ಮೀನಾಗೆ ತುಸು ಸಮಾಧಾನವಾಯಿತು.. ಅದಕ್ಕೆ ಮೇಲಾಗಿ ಬ್ಯಾಗ್ ಮಾತ್ರ ತನ್ನದು ಎನ್ನುವ ಅಂಶ ಇಬ್ಬರಿಗೂ ತುಸು ಧೈರ್ಯ ಕೊಟ್ಟಿತ್ತು.. 

"ಸರಿ ಮೇಡಂ. ನೀವು ಹೇಳೋದು ಸರಿ. ಈ ಬ್ಯಾಗ್  ಇಲ್ಲೇ ಇರಲಿ.. ನಾವು ವಿಚಾರಣೆ ಮಾಡಿ... ಮುಂದಿನ ಕ್ರಮದ ಬಗ್ಗೆ ಹೇಳ್ತೀವಿ.. ಮೇಡಂ ಅವರೇ ನಾವು ಹೇಳಿದಾಗ ನೀವು ಬರಬೇಕು.. ಮತ್ತೆ ನಮಗೆ ಹೇಳದೆ ಈ ಊರು ಬಿಟ್ಟು ಹೋಗಬಾರದು.. ಈ ಮೇಡಂ ನಿಮ್ಮ ಜೊತೆ ಬರೋದು ಬೇಡ.. ನೀವೇ  ಬಂದರೆ ಸಾಕು.. ಏನೂ ಹೆದರಿಕೆ ಬೇಡ.. " ಮೆಲ್ಲಗೆ ನಕ್ಕರು.. 

ತುಸು ನಿಟ್ಟುಸಿರು ಬಿಟ್ಟ ಸಂಜನಾ ಮತ್ತು ಮೀನಾ ಒಟ್ಟಿಗೆ "ಸರಿ ಸರ್.. ಹಾಗೆ ಆಗಲಿ"  ಎಂದರು.. 

ಈ ಮೇಡಂ "ಸರಿ ಸರ್ ನಾವು ಹೊರಡಬಹುದಾ .. "

"ಮೇಡಂ ಅದೆಂಗೆ ಹೊರಡ್ತೀರಾ.. ಇರೀ ಸ್ವಲ್ಪ ಹೊತ್ತು.. " 

"ಸರ್ ಆಗಲೇ ಬೆಳಗಿನ ಜಾವ  ನಾಲ್ಕು ಘಂಟೆ ದಾಟಿದೆ  . ಇನ್ನೂ ಇರಬೇಕಾ.. "

"ಇರಿ ಮೇಡಂ.. ನೀವು ಬಂದು ಒಂದು ಘಂಟೆ ಮೇಲಾಯಿತು.. ಸುಮ್ಮನೆ ಹಾಗೆ ಕಳಿಸುತ್ತೇವಾ .. ಇರಿ ಒಂದು ನಿಮಿಷ.. .. \ ಶರಣಪ್ಪ ಅವರಿಗೆ ಕಣ್ಣು ಹೊಡೆದರು.. ಶರಣಪ್ಪ ಸಿದ್ಧ ಎನ್ನುವ ಹಾಗೆ ಸನ್ನೆ ಮಾಡಿದರು. 

"ಮೇಡಂ.. ನಿಮ್ಮ ವಿವರ ನಮ್ಮ ಹತ್ತಿರ ಇದೆ.. ಅದರ ಪ್ರಕಾರ ಇವತ್ತು ನಿಮ್ಮ ಜನುಮದಿನ.. ನೀವು ಸ್ನೇಹಕ್ಕೆ ಎಷ್ಟು ಬೆಲೆ ಕೊಡ್ತೀರಾ ಅಂತ ಗೊತ್ತು.. ನಿಮ್ಮ ಸಮಾಜಮುಖಿ  ಕಾರ್ಯಗಳ ಬಗ್ಗೆ ನಮಗೆ ಮತ್ತು ನಮ್ಮ ಡಿಪಾರ್ಟ್ಮೆಂಟಿಗೆ ಗೊತ್ತಿದೆ.. ಅದಕ್ಕೆ ನಮ್ಮ ಡಿಪಾರ್ಟ್ಮೆಂಟ್ ಕಡೆಯಿಂದ ನಿಮಗೆ ಒಂದು ಪುಟ್ಟ ಸನ್ಮಾನ ಜೊತೆಗೆ ಜನುಮದಿನಕ್ಕೆ ಒಂದು ಕೇಕು .. Actually ನಾಳೆ ನಿಮಗೆ ಕರೆ ಮಾಡಿ ನಿಮ್ಮನ್ನು ಇಲ್ಲಿಗೆ ಕರೆಸಿಕೊಂಡು ಈ ಪುಟ್ಟ ಸನ್ಮಾನ ಮಾಡಬೇಕೆಂದುಕೊಂಡಿದ್ದೆವು... ಆದರೆ ಅಚ್ಚರಿ  ಎಂದರೆ ನೀವೇ ಇಲ್ಲಿಗೆ ಬಂದ್ರಿ.. 

"ಜನುಮದಿನದ ಶುಭಾಶಯಗಳು ಮೇಡಂ.. ನಿಮ್ಮ ಈ ಸಮಾಜಮುಖಿ ಕೆಲಸ ಸದಾ ಯಶಸ್ಸನ್ನು ತರುತ್ತಿರಲಿ.. ಶುಭವಾಗಲಿ" 



ಕಣ್ಣಲ್ಲಿ ನೀರು ತುಂಬಿಕೊಂಡು.. "ಶ್ರೀ ಪ್ರತಿ ಜನುಮದಿನದಲ್ಲೂ ಅಳಿಸೋದೇ ಕೆಲಸ ನಿಮ್ಮದು.. ಆದರೆ ಈ ಬಾರಿ ನನ್ನ ಇಷ್ಟವಾದ ಕಾಫೀ ಕೊಟ್ಟು.. ಒಂದು ರೀತಿಯಲ್ಲಿ ಕುತೂಹಲದ ತಿರುವಿನಲ್ಲಿ  ನಮ್ಮನ್ನು ನಿಲ್ಲಿಸಿ ಗೋಳು ಹುಯ್ಕೋತಾ ಇದ್ದೀರಾ.. ಧನ್ಯವಾದಗಳು ಶ್ರೀ.. ನಿಮ್ಮ ಈ ಶುಭಾಶಯಗಳಿಗೆ ಧನ್ಯವಾದಗಳು.. ಹಾಗೆ ಈ ಕೇಸಿನ ವಿಚಾರಣೆ ಮತ್ತು ಇದರ ಮುಂದಿನ ತಿರುವಿನ ಬಗ್ಗೆ ನನಗೆ ಖಂಡಿತ ಹೇಳಬೇಕು .."

ಶರಣಪ್ಪ, ಮೀನಾ, ಸಂಜನಾ ಜೊತೆಯಲ್ಲಿ ಸ್ಟೇಷನಿನಲ್ಲಿ ಇದ್ದ ಎಲ್ಲರೂ ಶುಭ ಹಾರೈಸಿದರು.. 

 ಮೆಲ್ಲನೆ ಸೂರ್ಯ ಬಾನಿನಲ್ಲಿ ರಂಗನ್ನು  ತುಂಬುತಿದ್ದ.. ಮತ್ತೊಂದು ಸ್ಟ್ರಾಂಗ್ ಕಾಫೀ ಕುಡಿದು.. ನವೋಲ್ಲಾಸದಿಂದ ಮೀನಾ ಮತ್ತು ಸಂಜನರನ್ನು ಕರೆದುಕೊಂಡು ಮನೆ ಕಡೆಗೆ ಹೊರಟರು.. 

ಮುಂದೆ.. !!!

Thursday, October 24, 2019

ಸಿಬಿ ಜನುಮದಿನದ ಶುಭಾಷಯಗಳು

ಹರಿಯ ದಶಾವತಾರದ ಬಗ್ಗೆ ಓದಿದ್ದೇವೆ..ಕೇಳಿದ್ದೇವೆ.. ಅದೊಂದು ರೀತಿಯಲ್ಲಿ ದಿನ ನಿತ್ಯದ ವಿಷಯವಾಗಿ ಒಂದಲ್ಲ ಒಂದು ರೀತಿ ನಮ್ಮ ಸುತ್ತಲೂ ಸುತ್ತುತ್ತಲೇ ಇರುತ್ತದೆ.

ಗೆಳೆತನ ಅನ್ನೋದು ಸುಮ್ಮನೆ ಸಿಕ್ಕವರ ಜೊತೆಯಲ್ಲೆಲ್ಲ ಆಗೋಲ್ಲ.. ಗಾಢವಾದ ಗೆಳೆತನ ಆಗಬೇಕೆಂದರೆ ಅಷ್ಟೇ ಆಳವಾದ ಬಂಧನ ಇರಬೇಕು.. ಅಂತಹ ಅತ್ಯುತ್ತಮ ಗೆಳತೀ ನಿವೇದಿತಾ ಚಿರಂತನ್ ಅಲಿಯಾಸ್ ಸಿಬಿ..

ಇವರ ಬುದ್ದಿಮತ್ತೆ, ವಿಷಯ ಚರ್ಚಿಸುವಿಕೆ, ಕಲೆ, ಸಾಹಿತ್ಯ ಇವನ್ನೆಲ್ಲ ಒಮ್ಮೆ ಗಮನಿಸಿದಾಗ ನನಗೆ ಹೊಳೆದದ್ದು.. ಹತ್ತು ವಿಷಯಗಳಲ್ಲಿ ನಿಪುಣನಾದ ಪ್ರಚಂಡ ರಾವಣ ಒಂದು ಕಡೆಯಾದರೆ.. ಹತ್ತು ಅವತಾರಗಳನ್ನು ಎತ್ತಿದ ಹರಿಯ ನೆನಪು ಒಂದು ಕಡೆ..

ಬನ್ನಿ ಅದನ್ನು ಹಾಗೆ ಒಮ್ಮೆ ಗಮನಿಸಿ ಬರೋಣ..

ಮತ್ಸ್ಯಾವತಾರ : ವಿಷಯಗಳ ಪ್ರಳಯ ಆಗುವಾಗ.. ಅದನ್ನು ಸರಿಯಾಗಿ ವಿಶ್ಲೇಷಿಸಿ ಅದಕ್ಕೊಂದು ಸರಿಯಾದ ನೆಲೆ ಕೊಡುತ್ತಾರೆ

ಕೂರ್ಮಾವತಾರ: ಚರ್ಚೆ ಮಾಡುವಾಗ ವಿಷಯದ ಭಾರಕ್ಕೆ.. ಚರ್ಚೆಗಳೇ ಮುಳುಗಿ ಹೋಗುವ ಸಂಭವ ಬಂದಾಗ ಕ್ಷೀರ ಸಾಗರವನ್ನು ಕಡೆಯುವಾಗ ಕೂರ್ಮ ಮುಳುಗುತ್ತಿದ್ದ ಮಂಧರ ಪರ್ವತವನ್ನು ತನ್ನ ಬೆನ್ನ ಮೇಲೆ ಹೊತ್ತು ಕಾರ್ಯ ನೆರವೇರುವಂತೆ ಇವರು ಕೂಡ ಚರ್ಚೆಯ ವಿಷಯ ಭಾರವಾಗಿ ಮುಳುಗದಂತೆ ನೋಡಿಕೊಳ್ಳುತ್ತಾರೆ

ವರಹ: ತನ್ನ ಗೆಳೆಯ ಗೆಳತಿಯರನ್ನು ರಕ್ಷಿಸುವ ಸಮಯ ಬಂದಾಗ ತಮ್ಮ ಶಕ್ತಿ ಮೀರಿ ಜೊತೆಯಾಗಿ ನಿಲ್ಲುತ್ತಾರೆ.. ಮತ್ತೆ ಅವರನ್ನು ಯಥಾಸ್ಥಿತಿಗೆ ತಲುಪಿಸುವಲ್ಲಿ ಯಶಸ್ವಿಯಾಗುತ್ತಾರೆ

ನರಸಿಂಹ: ನಂಬಿಕೆ, ಭಕ್ತಿಯಿಂದ ಪ್ರಹ್ಲಾದ ಸ್ತುತಿಸಿದಾಗ.. ಕಂಬದಿಂದ ಹೊರಗೆ ಬಂದು.. ರಕ್ಷಿಸಿದ ಹಾಗೆ.. ಇವರು ಜೊತೆಯಲ್ಲಿದ್ದಾಗ ಸೇಫ್ ಅನ್ನುವ ಭಾವ ಇರುತ್ತದೆ..

ವಾಮನ: ಆಕಾರದಲ್ಲಿ ಪುಟ್ಟದಾಗಿದ್ದರೂ ಇಡೀ ಮೂರುಲೋಕಗಳನ್ನು ತನ್ನ ಪಾದದಲ್ಲಿ ಅಳೆಯುವ ವಾಮನನಂತೆ.. ವಿಷಯ ಎಷ್ಟೇ ದೊಡ್ಡದಿರಲಿ.. ಅದರ ಆಕಾರಕ್ಕೆ ಬೆಳೆದು ವಿಷಯವನ್ನು ಮುಟ್ಟಿಸುವ ಪರಿ..

ಪರಶುರಾಮ: ಇಪ್ಪತ್ತದೊಂದು ಬಾರಿ ಭೂಮಂಡಲ ಸುತ್ತಿ ಕ್ಷತ್ರಿಯರನ್ನು ಅಳಿಸಿದಂತೆ.. ಇವರ ಜೊತೆಯಲ್ಲಿ ವಿಷಯವನ್ನು ಚರ್ಚಿಸಿದಷ್ಟು.. ಅದರಲ್ಲಿನ ಬೇಡವಾದ ವಿಷಯಗಳು ನಾಶವಾಗುತ್ತಾ ಹೋಗುತ್ತದೆ..

ರಾಮ: ರಾಮ ಭೋದಿಸಲಿಲ್ಲ.. ಆದರೆ ತಾನು ನೆಡೆದು ಅದನ್ನು ಮಾದರಿಯನ್ನಾಗಿ ಮಾಡಿದ.. ಇವರು ಹಾಗೆ ಹಾಗಿರಿ, ಹೀಗಿರಿ ಅಂತ ಹೇಳದೆ ತಮ್ಮ ವಿಚಾರಗಳ ಮೂಲಕ ತಮ್ಮ ಹಾದಿಯನ್ನು ತೋರುತ್ತಾರೆ..

ಕೃಷ್ಣ:  ಕೃಷ್ಣ ಬಿಡಿಸದ ಸಮಸ್ಯೆಗಳೇ ಇಲ್ಲ ಎನ್ನುತ್ತದೆ ಮಹಾಭಾರತ.. ಇವರ ಹತ್ತಿರ ಯಾವುದೇ ಸಮಸ್ಯೆ, ವಿಷಯಗಳನ್ನು ಹೇಳಿ.. ಅದನ್ನು ಬಿಡಿಸಿ ಅದಕ್ಕೆ ಒಂದು ತಾರ್ಕಿಕ ಪರಿಹಾರ ಕೊಡುತ್ತಾರೆ

ಬುದ್ಧ: ಸತ್ಯ , ಶಾಂತಿಗಾಗಿ ಬುದ್ಧ.. ಇವರ ಬಳಿ ಸತ್ಯ, ಶಾಂತಿ ಸದಾ ಇರುತ್ತದೆ.. ಮತ್ತೆ ಮಂದಸ್ಮಿತೆಯಾಗಿ ಗೆಳೆತನದ ಬಂಧವನ್ನು ಗಟ್ಟಿಗೊಳಿಸುತ್ತಾರೆ

ಕಲ್ಕಿ: ಯಾವುದೇ ವಿಷಯಗಳಲ್ಲಿ ಜಿಜ್ಞಾಸೆ ಮೂಡಿದಾಗ, ವಿಷಯ ಹಾದಿ ಬಿಟ್ಟು ಹೋಗುತ್ತಿದೆ ಎನ್ನುವಾಗ ಇವರ ಮಾತುಗಳು ವಿಷಯಗಳಿಗೆ ಮತ್ತೆ ಮರಳಿ ಬರುವುದೇ ಅಲ್ಲದೆ.. ಶಾಂತಿ ಮೂಡಿಸುವಲ್ಲಿ ಯಶಸ್ವಿಯಾಗುತ್ತಾರೆ..

ಇಂತಹ ಹತ್ತಾರು ಸುಮಧುರ, ಸದ್ಗುಣಗಳ ಒಡತಿ ನನ್ನ ಆತ್ಮೀಯ ಗೆಳತೀ ಎನ್ನುವುದರಲ್ಲಿ ನನಗೆ ಹೆಮ್ಮೆ..

ಸಿಬಿ ಜನುಮದಿನದ ಶುಭಾಶಯಗಳು .. ಸುಂದರ ದಿನ ನಿಮದಾಗಲಿ.. !!!

Tuesday, May 7, 2019

DFR... a Phenomenon!

ಜೇನಿನ ಗೂಡಿನಲ್ಲಿ ತನ್ನ ಪಾಡಿಗೆ ತನ್ನ  ಕೆಲಸ ಮಾಡುತ್ತಿರುವ ಜೇನುಗಳು ಒಮ್ಮೆ ತನ್ನ ಗುರುಗಳ ಬಳಿಗೆ ಹೋಗಿ ಕೇಳಿದವು 

"ಗುರುಗಳೇ ನಮ್ಮ ಪಾಡಿಗೆ ನಾವು ಕೆಲಸ ಮಾಡಿಕೊಂಡಿರುತ್ತೇವೆ ಹೂವಿನ ಮಕರಂದ ಹೀರಿ ಜೇನು ಗೂಡು ಕಟ್ಟುತ್ತೇವೆ.. ಮನುಜರಿಗೆ ಜೇನನ್ನು ಕೊಡುತ್ತೇವೆ.. ಇಲ್ಲಿ ನಮ್ಮದೇನಾದರೂ ಮಹಾನ್ ಪ್ರಯತ್ನವಿದೆಯೇ.. ?"

"ಜೇನುಗಳ ಎಂಥಹ ಸುಂದರ ಪ್ರಶ್ನೆ ಕೇಳಿದಿರಿ.. ಇದಕ್ಕೆ ಒಂದು ದೃಷ್ಟಾಂತ ಕತೆ ಹೇಳುತ್ತೇನೆ ಕೇಳಿ"

ಎಲ್ಲವೂ ತಮ್ಮ ಜುಯ್ ಗುಯ್ ಗುಡುವ ಸದ್ದು ಬಿಟ್ಟು ಕಿವಿಯಾನಿಸಿ ಕೂತವು.. 

ಆ ಬೊಮ್ಮ ಒಮ್ಮೆ ತನ್ನ ಸತ್ಯಲೋಕದಲ್ಲಿ ಸೃಷ್ಟಿ ಕಾರ್ಯದಲ್ಲಿ ನಿರತನಾಗಿದ್ದಾಗ.. ವೀಣೆ ಮಿಡಿಯುತ್ತಿದ್ದ ಶಾರದೆ ಕೇಳಿದಳು.. "ಏನ್ರಿ.. ನಿಮ್ಮ ಸೃಷ್ಟಿ ಅಮೋಘ, ಅದ್ಭುತ ಎನಿಸುವುದು ಯಾವಾಗ?"

"ಸರಸು.. ನಾ ಸೃಷ್ಟಿ ಮಾಡಿದ ಪ್ರಪಂಚದಲ್ಲಿ ತನ್ನ ಶಕ್ತಿಗೆ ಅನುಸಾರ ಇತರರ ಮೊಗದಲ್ಲಿ ಮಂದಹಾಸ ಮೂಡಿಸುವ ಚಮತ್ಕಾರ ಕಂಡಾಗ ನನ್ನ ಸೃಷ್ಟಿ ಅಮೋಘ ಅನಿಸುತ್ತದೆ.. "

ಕಿರೀಟ ತೆಗೆದಿಟ್ಟು.. ಬ್ರಹ್ಮನ ಮುಂದೆ ಬಂದು.. "ಸರಿಯಾಗಿ ಹೇಳಿ"

"ಸರಸು ನಗುವೆಂಬುದು ಒಂದು ಅಸ್ತ್ರ.. ಅದನ್ನು ಉಪಯೋಗಿಸುತ್ತ ಇದ್ದಾಗ.. ಎಲ್ಲವೂ ಸರಳವಾಗಿ, ನೇರವಾಗಿ ನಮಗೆ ದಾರಿ ಕಾಣುತ್ತದೆ.. ಕೃಷ್ಣನನ್ನು ಹೊತ್ತು ಸಾಗುವಾಗ ಯಮುನೆ ವಸುದೇವನಿಗೆ ಹಾದಿ ಬಿಟ್ಟ ಹಾಗೆ.. ನಗುವಿದ್ದಾಗ ಜಗವೇ ಸುಂದರ.. "

"ಏನೋ ರೀ.. ಇವತ್ತು ನಿಮ್ಮ ಮಾತು ಆ ಶ್ರೀಕಾಂತನ ತರಹ ಇದೆ.. ಏನೋ ಹೇಳುತ್ತೀರಿ.. ಏನೋ ಬರೆಯುತ್ತೀರಿ.. ಅರ್ಥವಾಗುತ್ತಿಲ್ಲ.. ಸರಿ ಒಮ್ಮೆ ಅವನನ್ನೇ ಕೇಳಿಬಿಡೋಣ ಬನ್ನಿ.. "

"ಮಗು ಶ್ರೀಕಾಂತ.. ನೀನು ಜನುಮದಿನ, ವಿವಾಹದಿನಾ.. ಅದು ಇದು ಅಂತ ಏನಾದರೂ ಗೀಚುತ್ತಲೇ ಇರುತ್ತೀಯ ಇದರಿಂದ ನಿನಗೇನೂ ಉಪಯೋಗ ಹೇಳುವೆಯಾ.. ?

ಬ್ರಹ್ಮನಿಗೆ ಮತ್ತು ಶಾರದೆಗೆ ನಮಸ್ಕರಿಸಿ.. "ದೇವಾ.. ನೀವು ತಲೆಯೊಳಗೆ ಇಟ್ಟುಕೊಟ್ಟ ಬುದ್ದಿಯನ್ನು ಉಪಯೋಗಿಸಿ ಅನಿಸಿದ್ದು ಬರೆಯುತ್ತೇನೆ.. ಇದರಲ್ಲಿ ದೊಡ್ಡತನವೇನು ಇಲ್ಲ.. ಇದರಲ್ಲಿ ಲಾಭ ನಷ್ಟವೇನು ಇಲ್ಲ.. ಜೇನುಗಳು ಹೂವುಗಳ ಮಕರಂದ ಹೀರಿ ಜೇನು ಮಾಡುತ್ತವೆ.. ಆ ಜೇನನ್ನು ಮನುಜ ಉಪಯೋಗಿಸುತ್ತಾನೆ.. ಹಾಗೆಯೇ ನನ್ನ ತಲೆಯೊಳಗೆ ನೀವು ಕೂತು ಬರೆಸುವ ಮಾತುಗಳಿಂದ... ಅವರ ಮೊಗದಲ್ಲಿ ಒಂದು ಸಣ್ಣ ನಗೆ ಬಂದರೆ ಸಾಕು ನನ್ನ ಜೀವನ ಸಾರ್ಥಕ.. ಜೇನಿನ ಉಪಯೋಗವಾದಾಗ ಜೇನು ನೊಣಗಳಿಗೆ ಸಾರ್ಥಕತೆ ಸಿಗುವ ಹಾಗೆ ಇದು.. " ಇದೆ ಮಾತನ್ನು ಮುಂದುವರೆಸುತ್ತಾ "ಜೇನಿನ ರುಚಿ, ಹೂವಿನ ಸುಗಂಧ, ತಂಗಾಳಿಯ ಹಿತ, ಸಮಾಜದಲ್ಲಿ ನಾಲ್ಕು ಜನಗಳಿಗೆ ಸಹಾಯ.. ಅವರಿಂದ ಹೊಗಳಿಕೆ, ಪ್ರಶಂಸೆ ಇಷ್ಟ ಪಡದೆ.. ತನ್ನ ಕಾಯಕದಲ್ಲಿ ತೊಡಗುವ ಪರಿಯೇ ಈ ಜೇನಿನ ಜೀವನ.. ಹಾಗೆ ಅದ್ಭುತ ಗೆಳತೀ ರೂಪ ಸತೀಶ್ ಅಲಿಯಾಸ್ DFR ಕೂಡ.. ಅವರ ಹುಟ್ಟಿದ ಹಬ್ಬ ಅಂದರೆ.. ಅವರನ್ನು ಅಕ್ಕ ಎಂದು ಆರಾಧಿಸುವ ಅನೇಕ ಅಕ್ಕ, ತಮ್ಮಗಳು, ಅಣ್ಣ, ತಂಗಿಯರು.. ಅವರ ಮನೆಗೆ ಹೋಗಿ.. ಅವರ ಬಿಡುವಿಲ್ಲದ ಕೆಲಸದ ನಡುವೆಯೂ ಅವರಿಗೆ ಶುಭಕೋರಿ, ಕೇಕ್ ಕಟ್ ಮಾಡಿ.. ಸಂಭ್ರಮಿಸುವ ಪರಿ.. ಇದಕ್ಕೆ ಸ್ವಾರ್ಥ ಎಲ್ಲಿದೆ.. ಎಲ್ಲವೂ ಮಮತೆ, ವಿಶ್ವಾಸ, ಪ್ರೀತಿ.. ಮಮಕಾರ.. ಅವರನ್ನು ಗೌರವಿಸಿ ತಮ್ಮನ್ನೇ ಗೌರವಿಸಿಕೊಳ್ಳುವ ಪರಿ.. "

*****

ನೋಡೀದಿರೇನಪ್ಪಾ .. ಜೇನಿನ ಕಾರ್ಯಕ್ಷಮತೆ, ರೂಪ ಸತೀಶ್ ಅವರ ಕಾರ್ಯಕ್ಷಮತೆ.. ಇವೆಲ್ಲವೂ ಜೀವನದಲ್ಲಿ ಅಳವಡಿಸಿಕೊಳ್ಳಬೇಕಾದ ಗುಣಗಳು... ಅಂದು ಕನಕದಾಸರು "ನಾ"ಹೋದರೆ ಹೋಗಬಹುದು ಎಂದಿದ್ದರು.. ಇಂದು ರೂಪ ಸತೀಶ್ "ನಾ"ಇದ್ದರೇ ಮಂದಹಾಸ ನಲಿದಾಡುವುದು ಎಂದು ಹೇಳುತ್ತಾರೆ.. ಗಿಡದಲ್ಲಿ ಮುಳ್ಳಿದ್ದ ಮಾತ್ರಕ್ಕೆ ಹೂವು ಸುಂದರವಾಗಿರೋಲ್ಲ.. ಮುಳ್ಳನ್ನು ಮೆಟ್ಟಿ ನಿಂತು ಮುಳ್ಳನ್ನು ಮರೆಮಾಚಿ ಹೂವಿನ ಅಂದ ಕಾಣಿಸುವ ಹಾಗೆ.. ಮೊಗದಲ್ಲಿ ನಗುವಿದ್ದಾಗ ಜಗದಲ್ಲಿ ನೋವಿಗೆ ಜಾಗವೆಲ್ಲಿ.. ಜೇನುಗಳ ನಿಮ್ಮ ಸ್ವಾರ್ಥ ರಹಿತ ಕೆಲಸ.. ನಮ್ಮೆಲ್ಲರ ನೆಚ್ಚಿನ ರೂಪ ಸತೀಶ್ ಅವರ ಕಾಯಕ ಎರಡೂ ಒಂದೇ.. 


ಜೇನುಗಳಿಗೆ ಅರ್ಥವಾಯಿತು.. ಕಥಾ ಸಾರಾಂಶ.. ಜೊತೆಯಲ್ಲಿ ಇಂದು ನಮ್ಮಂತೆಯೇ ಕಾರ್ಯನಿರತವಾಗಿರುವ ರೂಪ ಸತೀಶ್ ಅವರ ಜನುಮದಿನ ಕೂಡ ಎಂದು ಅರಿವಾಯಿತು.. ಗುಯ್ ಎನ್ನುತ್ತಾ ತಮ್ಮ ಭಾಷೆಯಲ್ಲಿ ಜನುಮದಿನಕ್ಕೆ ಶುಭಾಶಯಗಳನ್ನು ಕೋರಿದವು.. !!!

DFR ಜನುಮದಿನದ ಶುಭಾಶಯಗಳು!!!

Sunday, December 30, 2018

ಮತ್ತೆ ಬಾಲ್ಯಕ್ಕೆ ಶಾಲಾದಿನಗಳ ಕಡೆಗೆ.. 30.12.2018

​​
ಗೆಳೆತನ ಎಂದರೇನು..

ಶಾಲೆದಿನಗಳಲ್ಲಿಯಾಗಲಿ, ಸಹೋದ್ಯೋಗಿಗಳ ಜೊತೆಯಾಗಲಿ ಒಂದಷ್ಟು ಅದ್ಭುತ ಕ್ಷಣಗಳನ್ನು ನೆನೆಪಿಸಿಕೊಂಡು ಖುಷಿ ಪಡುವ ಆ ಘಳಿಗೆಗಳು ಅತ್ಯಮೂಲ್ಯ..

ಗೆಳೆತನ ಶುರುವಾಗೋದು ನಮ್ಮ ಪದವಿ, ಅಂತಸ್ತು, ಸಾಮಾಜಿಕ ಸ್ಥಾನಗಳಿಂದಲ್ಲ.. ಶುದ್ಧ ಮನಸ್ಸಿನ ಸರೋವರವದು.. ನಾವೆಲ್ಲಾ ಭೇಟಿಯಾಗೋದು ಇಂದು ನಾವೇನಾಗಿದ್ದೇವೆ ಎಂಬುದಕ್ಕಲ್ಲ.. ಅಂದು ನಾವು ಗೆಳೆಯರಾಗಿದ್ದೆವು ಇಂದೂ ಆ ಗೆಳೆತನದ ಭಾವವನ್ನು ಮುಂದುವರೆಸಿಕೊಂಡು ಹೋಗೋಣ ಎನ್ನುವ ಮನೋಸ್ಥಿತಿಯಿಂದ ಮಾತ್ರ ಭೇಟಿ ಸಾಧ್ಯ..

ಹೇಗೆ ನಿಂತಿದ್ದೇವೆ ಎನ್ನುವುದಕ್ಕಿಂತ ಗೆಳೆಯರ ಜೊತೆ ನಿಲ್ಲುವುದು ಮುಖ್ಯ..
(ಎಲ್ಲಾ ಗಾಡಿಗಳು ಒಂದು ದಿಕ್ಕಿನಲ್ಲಿ ನಿಂತಿದ್ದಾರೆ...
ಒಂದೇ ಒಂದು ಗಾಡಿ ವಿರುದ್ಧ ದಿಕ್ಕಿನಲ್ಲಿ ನಿಂತಿದೆ..
ಈ ಚಿತ್ರ ತೆಗೆಯಲು ಸ್ಫೂರ್ತಿ ನೀಡಿದ ರೂಪಶ್ರೀಗೆ ವಂದನೆಗಳು) 

ನ್ಯಾಷನಲ್ ಹೈ ಸ್ಕೂಲಿನಲ್ಲಿ ಓದಿದ್ದ ನಮ್ಮ ಸಹಪಾಠಿಗಳನ್ನು ಸುಮಾರು ೨೦೧೧ಇಸವಿಯಿಂದ ಅಂದ್ರೆ ಸುಮಾರು ಏಳು ವರ್ಷಗಳಿಂದ  ಭೇಟಿ ಮಾಡುತ್ತಲೇ ಇದ್ದೇವೆ.. ವರ್ಷ ವರ್ಷಕ್ಕೂ ಬರುವ ಗೆಳೆಯರ ಸಂಖ್ಯೆ ಬೆಳೆಯುತ್ತಿದೆ.. ಖುಷಿಯ ಸಂಗತಿ..  ಹಲವಾರು ವರ್ಷಗಳ ನಂತರ ಭೇಟಿಯಾದಾಗ ಸಿಗುವ ಆ ಖುಷಿ.. ಸಾಮಾಜಿಕ ಜಾಲತಾಣಗಳಿಲ್ಲದ ನಮ್ಮ ಆ ದಿನಗಳಿಂದ.. ಇಂದು ಬೆರಳಿನ ತುದಿಯಲ್ಲಿ ಪ್ರಪಂಚವೇ ಸಿಗುವ ಈ ದಿನಗಳ ನಡುವೆ ನಮ್ಮ ಗೆಳೆತನ ಗಟ್ಟಿಯಾಗಿ ನಿಂತಿರುವುದು ನಮ್ಮ ಶುದ್ಧ ಮನಸ್ಥಿತಿಯಿಂದ, ಗೆಳೆತನಕ್ಕೆ ಹಾತೊರೆಯುವ ನಮ್ಮೆಲ್ಲರ ಮನಸ್ಸಿನಿಂದ ಮಾತ್ರ..

ಅನಿಲ್,  ಗಿರೀಶ್ (ಎಚ್ ಡಿ ಮತ್ತು ಕೆ ಎಸ್), ಕಿರಣ್, ವೆಂಕಟೇಶ, ಚಂದ್ರಪ್ರಭ, ಕುಸುಮ, ನರೇಂದ್ರ ಇವರೆಲ್ಲಾ ಮೊದಲ ಬಾರಿಗೆ ಸಿಕ್ಕಾಗ ಸಂಭ್ರಮಿಸಿದ ಘಳಿಗೆಗಳು ಸೊಗಸಾಗಿದ್ದವು..

ಇಂದು ಕುಸುಮ ಮೊದಲ ಬಾರಿಗೆ ನಮ್ಮ ಗೆಳೆತನದ ಭೇಟಿಗೆ ಬಂದಾಗ.. ಅವರ ಮಾತುಗಳಲ್ಲಿ ನಾ ಕಂಡಿದ್ದು.. ಹೇಗೆ ಮಾತಾಡುವುದು, ಏನು ಮಾತಾಡುವುದು ಎನ್ನುವ ಗೊಂದಲ ಎನ್ನುವುದಕ್ಕಿಂತ ಹಿಂಜರಿಕೆ.. ಆದರೆ ನಮ್ಮ ವೆಂಕಿ ಇದ್ದಾನಲ್ಲ. ಅವನು ಯಾರನ್ನು ಆ ಗೊಂದಲದಲ್ಲಿ ಇರಲು ಬಿಡುವುದಿಲ್ಲ.. ಅವರ ಲೆವೆಲ್ಲಿಗೆ ಹೋಗಿ ಮೆಲ್ಲಗೆ ಕೈಹಿಡಿದು ನಮ್ಮೆಲ್ಲರ ಲೆವೆಲ್ಲಿಗೆ ಕರೆತರುವ ಅವನ ಮಾತುಗಳಿಗೆ ಸೋಲದವರು ಯಾರಿದ್ದಾರೆ..


ಸ್ವಲ್ಪ ಹೊತ್ತಿನಲ್ಲಿಯೇ ಕುಸುಮ ಸಹಜವಾಗಿ ಮಾತಾಡಲು ಶುರುಮಾಡಿದಳು... ಶಶಿ ಜೊತೆ ಫಾರ್ಮಲ್ ಆಗಿ ಆಡುತ್ತಿದ್ದ ಮಾತುಗಳು ವೆಂಕಿ ಬಂದಮೇಲೆ ಆರಾಮಾಗಿ ಶುರುವಾಯಿತು.. ನಂತರ ಲೀಲಾ, ರೂಪ, ಚಂದ್ರಪ್ರಭ ಬಂದ ಮೇಲೆ ಇನ್ನಷ್ಟು ಹಗುರಾಯಿತು.. ಆಗ ಸಿಕ್ಕಿದ್ದು ಮಾಸ್ಟರ್ ಸ್ಟ್ರೋಕ್ ಗಿರೀಶ್.. ಅವನ ಲೀಲಾಜಾಲವಾದ ಮಾತುಗಳು ಎಲ್ಲರನ್ನು ಇನ್ನಷ್ಟು ಹಗುರ ಮಾಡಿತು.. ಇಂದು ನಾವೆಲ್ಲರೂ ನಮ್ಮ ನಮ್ಮ ಕ್ಷೇತ್ರಗಳಲ್ಲಿ ಬೆಳೆದು ನಿಂತಿದ್ದೇವೆ ನಿಜ.. ಆದರೆ ನಮ್ಮ ಭೇಟಿ ನಾವು ಮೂರು ವರ್ಷ ಹೈ ಸ್ಕೂಲ್ ದಿನಗಳ ಗೆಳೆತನದ ಸುತ್ತ ಮಾತ್ರ ಸುತ್ತುತ್ತಿತ್ತು..


ಅಮೆರಿಕಾದಲ್ಲಿರುವ ರಮೇಶ್ ಸ್ಕೈಪ್ ಆಪ್ ಮೂಲಕ ನಮ್ಮೆಲ್ಲರ ಜೊತೆ ಮಾತಾಡಿದ್ದು..  ಬಹಳ ವರ್ಷಗಳ ನಂತರ ಸಿಕ್ಕಿದ್ದು ಅವನಿಗೂ ಖುಷಿ.. ಗೆಳೆಯನ ಜೊತೆ ಮಾತಾಡಿದ್ದು ನಮಗೂ ಖುಷಿ.. ಸುಮಾರು ಹದಿನೈದು ನಿಮಿಷಗಳು ಕರೆ ಮೂವತ್ತು ವರ್ಷಗಳ ಇತಿಹಾಸವನ್ನು ರೀವೈ೦ಡ್ ಮಾಡಿತ್ತು...

ಪ್ರಸಾದ್ ಬಂದ...  ಮಾತುಗಳು ಇನ್ನಷ್ಟು ಹಾಸ್ಯವನ್ನು ತುಂಬಿಕೊಂಡವು.. ಗೆಳೆಯರ ಕಾಲು ಎಳೆಯುವುದು, ನಗುವುದು ನೆಡೆದಿತ್ತು.. ಶ್ರೀಧರ ಬಂದ ಮೇಲೆ ವೆಂಕಿಯ ಸುತ್ತಾ ಮಾತುಗಳು ಜಾಸ್ತಿಯಾದವು.. (ಇಲ್ಲ ಇಲ್ಲ ಮುತ್ತತ್ತಿ ಅಡಿಗೆಯ ವಿಷಯ ಮಾತಾಡೋಲ್ಲ). ಮಾತು ಮಾತು ಮಾತು ಮುಗಿಯದಷ್ಟು ಮಾತುಗಳು.. ಗಿರೀಶನ ಶಾಲಾದಿನಗಳ ಘಟನೆಗಳು, ಹದಿನೈದು ವರ್ಷಗಳು ಸತತವಾಗಿ ಈ ಕೆಳಗಿನ ಶ್ಲೋಕವನ್ನು ಹೇಳಿದ ದಾಖಲೆ ಅವನದು ..

ಯಂ ಬ್ರಹ್ಮಾವರುಣೇಂದ್ರ ರುದ್ರಮರುತಃ
ಸ್ತುನ್ವಂತಿ ದಿವ್ಯೈಃ ಸ್ತವೈಃ
ವೇದ್ಯೆಸ್ಸಾಂಗಪದಕ್ರಮೋಪನಿಷದೈಃ
ಗಾಯಂತಿ ಯಂ ಸಾಮಗಾಃ
ಧ್ಯಾನಾವಸ್ಥಿತ ತದ್ಗತೇನ ಮನಸಾ
ಪಶ್ಯಂತಿ ಯಂ ಯೋಗಿನಃ
ಯಸ್ಯಾಂತಂ ನ ಮಿದುಸ್ಸುರಾಸುರ ಗಣಾಃ
ದೇವಾಯ ತಸ್ಮೈ ನಮಃ.. ಇನ್ನೂ ಇದೆ..


ಮಾತುಗಳ ಬತ್ತಳಿಕೆ ಮುಗಿದಿರಲಿಲ್ಲ.. ಆದರೆ ಹೊಟ್ಟೆ ಚುರುಗುಟ್ಟುತ್ತಾ ಇತ್ತು.. ಹಾಗಾಗಿ.. ಎಸ್ ಎಲ್ ವಿ ಕಡೆಗೆ ಹೆಜ್ಜೆ ಹಾಕಿದೆವು.. ಅಲ್ಲಿ ತಿಂದದ್ದು ಹೋಟೆಲಿನವ ತಂದು ಕೊಟ್ಟಿದ್ದನ್ನು ಆದರೆ.. ಅದರಿಂದ ಹೊಟ್ಟೆ ತುಂಬಿದ್ದಕಿಂತ ನಮ್ಮೆಲ್ಲರ ಹಾಸ್ಯ ಚಟಾಕಿಗಳಿಂದ ಹೊಟ್ಟೆ ತುಂಬಿದ್ದು ಹೆಚ್ಚು.. ಕೆಲವರಿಗೆ ಕಣ್ಣಲ್ಲಿ ನೀರು ತರಿಸುವಷ್ಟು ನಗೆ ಬಂದರೆ, ಇನ್ನು ಕೆಲವರಿಗೆ ಮಾತಾಡಲು ಆಗದಷ್ಟು ನಗೆ ಹೂರಣ ಬಡಿಸಿತ್ತು.. ಗಿಜಿಗಿಜಿ ಗುಟ್ಟವ ಭಾನುವಾರದ ದಿನವೂ, ನಮ್ಮ ಮಾತುಗಳಿಂದ ಅಲ್ಲಿ ಒಂದು ದೊಡ್ಡ ಸ್ಫೋಟವೇ ಆಗಿತ್ತು... ಅಕ್ಕಪಕ್ಕದವರ ಪರಿವೆ ನಮಗ್ಯಾರಿಗೂ ಇರಲಿಲ್ಲ.. ನಾವು  ನಮ್ಮ ಮಾತುಗಳು ನಮ್ಮ ಗೆಳೆಯರು.. ಇಷ್ಟೇ ತಲೆಯಲ್ಲಿದ್ದದ್ದು..


ಅನೂಪ್ ನಮ್ಮ ಗ್ಯಾಂಗ್ ಸೇರಿದ್ದು ತಡವಾಗಿದ್ದರೂ ... ಅವನ ಮಾತುಗಳು ಹಾಸ್ಯರಸವನ್ನು ಇನ್ನಷ್ಟು ಮೇಲಕ್ಕೇರಿಸಿತ್ತು .. ಇನ್ನೊಂದಷ್ಟು ಮಾತುಗಳು, ಅವನ ಕೆಲವು ಅನುಭವಗಳು ಮುದನೀಡಿತ್ತು..

ನಾವು ಸೇರಿದ್ದೇವೆ ಅಂದರೆ ಏನಾದರೂ ತರಲೆ ಇರಲೇ ಬೇಕಲ್ಲವೇ.. ಲೀಲಾ.. ಫೈರ್ ಪಾನ್ ತಿಂತೀನಿ ಅಂದಾಗ ನಮ್ಮೆಲ್ಲರ ಮೊಬೈಲ್, ಕ್ಯಾಮೆರಾ ಅತ್ತ ಕಡೆ ತಿರುಗಿತ್ತು.. ಮುಂದೆ ನೆಡೆದದ್ದು ಇನ್ನೊಂದು ನಗೆಯ ಮೆರವಣಿಗೆ.. ಫೈರ್ ಪಾನ್ ಹೇಗಿತ್ತು ಹೇಗಿರಲಿಲ್ಲ ಎನ್ನುವುದಕ್ಕಿಂತ... ನಮ್ಮ ನಗೆಯ ತೇರನ್ನು ಎಳೆಯೋಕೆ ಇನ್ನೊಂದು ಅಸ್ತ್ರ ಸಿಕ್ಕಿದ್ದು ಸುಳ್ಳಲ್ಲ..



ಈ ಭೇಟಿಗಳಲ್ಲಿ ಸಾಮಾನ್ಯ ಎರಡು ಘಂಟೆ ಕಳೆಯುವ ನಾವು ಇಂದು.. ಬೆಳಿಗ್ಗೆ ಹನ್ನೊಂದರಿಂದ ಓಹ್ ಸಾರಿ ಹತ್ತು ಮುಕ್ಕಾಲು ಘಂಟೆಯಿಂದ ಮದ್ಯಾನ್ಹ ಮೂರುವರೆ ಘಂಟೆಯ ತನಕ ನಾನ್ ಸ್ಟಾಪ್ ಹಾಸ್ಯ ಬಸ್ಸಲ್ಲಿ ಓಡಾಡಿದ್ದು ವಿಶೇಷ..



ಮೂರು ದಾರಿ ಸೇರುವ ಜಾಗದಲ್ಲಿ ಗಣಪತಿಯ ವಿಗ್ರಹ, ಫೋಟೋ ಇಟ್ಟು ಪೂಜಿಸುತ್ತಾರೆ.. ಎಲ್ಲೆಡೆಯೂ ಕಾಣುವ ಆ ಮಹಾಮಹಿಮನನ್ನ ಮರದಲ್ಲಿ ಕಂಡರೆ.. ಎಲ್ಲಾ ದಿಕ್ಕುಗಳಲ್ಲಿಯೂ ಪಸರಿಸಿರುವ ನಮ್ಮ ಗೆಳೆತನದ ಅಧಿನಾಯಕ ನಮ್ಮೆಲ್ಲರ ಮನಸ್ಸು. ಅದನ್ನು ನಮ್ಮ ಎಲ್ಲಾ ಗೆಳೆಯರ ಮನದಲ್ಲಿ ಕಾಣುತ್ತಿದ್ದೇವೆ..  ಅದಕ್ಕೆ ಒಂದು ಸಲಾಂ ಹೇಳೋಣ ಅಲ್ಲವೇ..
ಲೋ ಶ್ರೀಕಿ ಈ ಚಿತ್ರ ತೆಗೆಯೋ ನಿನಗೆ ಬರೆಯೋದಕ್ಕೆ
ಉಪಯೋಗವಾಗುತ್ತದೆ ಎಂದ ವೆಂಕಿಗೆ ಒಂದು ಸಲಾಂ 
ಒಂದು ಭಾನುವಾರವನ್ನು ಆಲಸ್ಯವಾಗಿ ಅದರಲ್ಲೂ ಕ್ಯಾಲೆಂಡರ್ ವರ್ಷದ ಕೊನೆಯಲ್ಲಿ ಆರಾಮಾಗಿ ಕಳೆಯುವ ಭಾನುವಾರವನ್ನು ಸಂತಸ, ಉಲ್ಲಾಸಯುಕ್ತ ದಿನವನ್ನಾಗಿ ರೂಪಿಸಿಕೊಂಡಿದ್ದು ನಮ್ಮ ಗೆಳೆತನದ ವಿಶೇಷವಾಗಿತ್ತು..

ಏನೀ ಸ್ನೇಹ ಸಂಬಂಧ ಎಲ್ಲಿಯದೋ ಈ ಅನುಬಂಧ.. ಗೆಳೆತನ ಇರಲಿ ಚಿರಕಾಲ.. 

Thursday, December 20, 2018

ರಂಗೋಲಿ ಹತ್ರ .. !!!

ರಾಜೀವನಿಗೆ ತಲೆ ಪೂರ್ತಿ ಕೆಟ್ಟುಹೋಗಿತ್ತು.. ಖುಷಿ ಪಡಬೇಕೋ ಇಲ್ಲಾ ಹೀಗಾಯ್ತಲ್ಲ ಅಂತ ತಲೆ ಚಚ್ಚಿಕೊಳ್ಳಬೇಕೋ ಗೊತ್ತಾಗುತ್ತಿರಲಿಲ್ಲ.. ವೃತ್ತಿಯಲ್ಲಿ ಬಹುಮಟ್ಟಿಗೆ ಯಶಸ್ಸು ಸಾಧಿಸಿದ್ದ ತನ್ನ ನೂರಾರು ವೃತ್ತಿ ಸಂಬಂಧಿ ಕಂಪನಿಗಳ ನೊರೆಂಟು ಸಮಸ್ಯೆಗಳನ್ನು ನಗು ನಗುತ್ತ ಬಿಡಿಸಿದವನಿಗೆ ತಲೆ ಚಿಟ್ಟು ಹಿಡಿದಿತ್ತು..

ತನ್ನ ಆಪ್ತ ಗೆಳೆಯ ರವೀಂದ್ರನಿಗೆ ಹೇಳಿಕೊಂಡ.. "ಲೋ ಗುರು.. ಇದಕ್ಕೆ ಯಾಕೆ ಅಷ್ಟೊಂದು ತಲೆ ಕೆಡಿಸ್ಕೊತೀಯ.. ಪಾನಿ ಪುರಿ ಕೊಡಿಸ್ತೀಯಾ.. ಐಡಿಯಾ ಕೊಡ್ತೀನಿ"

"ಅಷ್ಟೇ ತಾನೇ.. ಆಗಲಿ" ಹೊಟ್ಟೆ ತುಂಬಾ ಪಾನಿ ಪುರಿ ಸೇವೆ ಆಯಿತು..

 ರವೀಂದ್ರ.. ಮೆಲ್ಲಗೆ ಕಿವಿಯಲ್ಲಿ ಏನೋ ಉಸುರಿದ ..

ಮತ್ತೇನೂ ಮಾಡದೆ.. ಹೊಸದಾಗಿ ಕೊಂಡಿದ್ದ ಜಾವಾ ಬೈಕ್ ಹತ್ತಿ ಹೊರಟ .. ಮನಸ್ಸು ಹಗುರಾಗಿರಲಿಲ್ಲ ಆದರೆ ಕತ್ತಲೆ ಸುರಂಗದಲ್ಲಿ ಎಲ್ಲೋ ಒಂದು ಬೆಳಕಿನ ಬಿಂದು ಕಂಡ ಹಾಗಿತ್ತು ರವೀಂದ್ರನ ಮಾತುಗಳು..

ದೊಡ್ಡದಾದ ಕಟ್ಟಡ.. ಆಧುನಿಕ ವಿನ್ಯಾಸದಿಂದ ಸೊಗಸಾಗಿತ್ತು.. ಸೆಕ್ಯೂರಿಟಿ ಕಚೇರಿಯಲ್ಲಿ ತನ್ನ ಹೆಸರು ವಿಳಾಸ ಯಾರನ್ನು ಭೇಟಿ ಮಾಡಬೇಕು ಎಲ್ಲಾ ವಿವರವನ್ನು ಬರೆದು.. ಲಿಫ್ಟ್ ಇದ್ದರೂ ೨೮ನೇ ಮಹಡಿಗೆ ಮೆಟ್ಟಿಲುಗಳನ್ನೇ ಆಶ್ರಯಿಸಿದ.. ಏನೂ ಹೇಳಬೇಕು ಏನು ಕೇಳಬೇಕು.. ಹೇಗೆ ವಿವರಿಸಬೇಕು ಎಂದೆಲ್ಲ ಮನದಲ್ಲಿಯೇ ತಾಲೀಮು ಮಾಡಿಕೊಳ್ಳಲು ಈ ಮೆಟ್ಟಿಲು ಶ್ರಮ ಸಹಾಯ ಮಾಡುವುದು ಎನ್ನುವುದು ಅವನ ಎಣಿಕೆಯಾಗಿತ್ತು..

"ನಮಸ್ಕಾರ ನಾನು ರಾಜೀವ್.. ರವೀಂದ್ರ ಕಳಿಸಿದ್ದಾರೆ.. ಮೃಣಾಲಿನಿ ಮೇಡಂ ಅವರನ್ನು ಭೇಟಿ ಮಾಡಬೇಕಿತ್ತು.. " ಇಷ್ಟು ಹೇಳಿ ಸುಸ್ತಾಗಿತ್ತು.. ಅಲ್ಲಿಯೇ ಇದ್ದ ಸೋಫಾದ ಮೇಲೆ ಸ್ವಾಗತಕಾರಿಣಿ ಹೇಳುವುದಕ್ಕೆ ಮೊದಲೇ ಹೋಗಿ ಕೂತ...

ರಾಜೀವ್ ಸರ್... ಐದು ನಿಮಿಷ ಬಿಟ್ಟು.. ಮೇಡಂ ಅವರ ಕ್ಯಾಬಿನಿಗೆ ಹೋಗಬಹುದು.."

ಕ್ಯಾಬಿನ್ ಸುಂದರವಾಗಿ ಸಜ್ಜಾಗಿತ್ತು.. ಅಲ್ಲಿದ್ದ ಒಂದು ಚಿತ್ರ ಅವನು ಬಂದಿದ್ದು ಸರಿಯಾದ ಸ್ಥಳ ಎಂದು ಅರಿವಾಯಿತು..

"ಹೇಳಿ ರಾಜೀವ್.. ರವೀಂದ್ರ ಎಲ್ಲಾ ಹೇಳಿದ್ದಾರೆ.. ಎಲ್ಲಿ ಕೊಡಿ ಆ ವಿವರಗಳನ್ನು"

ಏಕ್ ದಂ ವಿಷಯಕ್ಕೆ ಬಂದಿದ್ದು.. ಆಕೆಯ ವೃತ್ತಿಪರತೆಯನ್ನು ಎತ್ತಿ ತೋರಿಸಿತು.

ಅಲ್ಲಿದ್ದದ್ದು ೩೦೦ ಸೆಕೆಂಡ್ಸ್.. ೩೦೧ ಸೆಕೆಂಡ್ ಕ್ಯಾಬಿನ್ ಹೊರಗಡೆ ಇದ್ದ.. ಹೋಗುವ ಮುನ್ನ.. ಬ್ಯಾಂಕ್ ಅಕೌಂಟ್ ವಿವರ ಕೊಟ್ಟಿದ್ದರು.. ಒಂದು ವಾರ ಕಳೆದ ಮೇಲೆ.. ಅಕೌಂಟಿಗೆ ಹಣ ಜಮಾ ಮಾಡಿದ ಮೇಲೆ ಬರೋಕೆ ಹೇಳಿದ್ದರು.. 

ಕೆಲಸದ ಗಡಿಬಿಡಿಯಲ್ಲಿ ವಿಚಾರ ಮರೆತು ಹೋಗಿತ್ತು.. ಆತನ ಸಹಾಯಕ .. "ಸರ್.. ನಿಮ್ಮ ಕ್ಯಾಲೆಂಡರ್ ಪ್ರಕಾರ ನಾಳೆ ೧೨ ಘಂಟೆಗೆ #$#$#$ ಆಫೀಸ್ ನಲಿ ಮೀಟಿಂಗ್ ಇದೆ" ಎಂದ ಮೇಲೆ ಅರಿವಾಗಿದ್ದು..

"ಸರಿ  ಥ್ಯಾಂಕ್ ಯು"

ಮಾರನೇ ದಿನ ಹೊರಟಿದ್ದ ..ಮತ್ತೆ ಜಾವ ಬೈಕಿನಲ್ಲಿ..

ಮೃಣಾಲಿನಿ ಎದ್ದು ನಿಂತು.. ಬನ್ನಿ ರಾಜೀವ್.. ರಿಪೋರ್ಟ್ ನಿಮ್ಮ ಜಿ-ಮೈಲ್ ಗೆ ಕಳಿಸಿದ್ದೇನೆ.. ಇದಕ್ಯಾಕೆ ಇಷ್ಟೊಂದು ತಲೆ ಕೆಡಿಸಿಕೊಂಡಿದ್ರಿ.. ಇದೊಂದು ಪ್ರೇಮಯಾಚನೆ ಅಷ್ಟೇ.. ಜಸ್ಟ್ ಚಿಲ್" ಎಂದು ಹಸ್ತ ಲಾಘವ ಮಾಡಿ.. ಕರೆ ಸ್ವೀಕರಿಸಿ ಮಾತಾಡತೊಡಗಿದರು ಮೃಣಾಲಿನಿ..

ಎಲ್ಲಾ ಗೊಂದಲ.. ಸ್ವಾಗತಕಾರಿಣಿ.. ಸರ್ ನೀವು ಆ ಗೆಸ್ಟ್ ಮೀಟಿಂಗ್ ರೂಮ್ ಉಪಯೋಗಿಸಬಹುದು.. ವೈಫೈ ಪಾಸ್ವರ್ಡ್ ಕೊಡ್ತೀನಿ.. ಮೇಲ್ ಚೆಕ್ ಮಾಡಿ. ನಿಮಗೆ ಸಮಾಧಾನವಾದ ಮೇಲೆ ನೀವು ಮೇಡಂ ಹತ್ರ ಮಾತಾಡಬಹುದು.. " ಎನ್ನುತ್ತಾ  ಹಲೋ ಯಸ್.. ಕಮ್ ಟು ಟ್ವೆಂಟಿ ಏಟ್ ಫ್ಲೋರ್" ಎನ್ನುತ್ತಾ ಬ್ಯುಸಿಯಾದಳು ಆಕೆ..

ಎಲ್ಲಾ ಅಯೋಮಯ.. ಇದು ಯಾರು ಬರೆದ ಕತೆಯೋ ನನಗಾಗಿ ಬಂದ ವ್ಯಥೆಯೋ ಎನ್ನುತ್ತಾ ಲ್ಯಾಪ್ಟಾಪ್ ಬಿಚ್ಚಿದ..

"ಹಲೋ ರಾಜೀವ್.. ಇದೊಂದು ಪ್ರೇಮ ಪತ್ರ . ನೋಡಿ ವಿವರವಾಗಿ ನೀಡುತ್ತೇನೆ.. PPT ಓಪನ್ ಮಾಡಿ.. "

PPT ಬಿಚ್ಚಿಕೊಳ್ಳುತ್ತಾ ಹೋಯಿತು..

ಪ್ರಿಯ ರಾಜೀವ್ ನಾನು ನಿಮ್ಮನ್ನು ಪ್ರೀತಿಸುತ್ತೇನೆ.. ಇದಕ್ಕೆ ಸಾಕ್ಷಿ ಶಂಖ .. ನನ್ನ ಪ್ರೀತಿ ಶಂಖದ ಹಾಗೆ.. ಪ್ರೀತಿಯನ್ನು ಕೂಗಿ ಹೇಳುತ್ತದೆ.. ಚಕ್ರ.. ನಿಮ್ಮ ಸುತ್ತಲೂ ಸುತ್ತುತ್ತಲೇ ಇರುತ್ತದೆ.. ನಕ್ಷತ್ರಗಳು.. ನನ್ನ ಕಣ್ಣಿನಲ್ಲಿ ನಿಮ್ಮನ್ನು ಕಂಡಾಗ ಹೊಮ್ಮುವ ಮಿಂಚು ಅದು.. ಅದರ ಸುತ್ತಲೂ ಇರುವ ವೃತ್ತವೆ ನಮ್ಮ ಜೀವನದ ಪರಿಧಿ.. !!!



ನಿಮ್ಮನ್ನು ನಾನು ಎಷ್ಟು ಇಷ್ಟ ಪಡುತ್ತೇನೆ ಹುಲಿ ಮುದ್ದು ಎನ್ನುತ್ತಾರೆ ಅಲ್ವ.. ಹಾಗೆ ಮಧ್ಯದಲ್ಲಿರುವ ಹುಲಿಯ ಮೈಮೇಲಿನ ಪಟ್ಟೆಗಳು ಹೇಳುತ್ತವೆ.. ನಾ ನಿಮ್ಮನ್ನು ಅಷ್ಟು ಗಾಢವಾಗಿ ಪ್ರೀತಿಸುತ್ತೇನೆ ಎನ್ನುವುದಕ್ಕೆ ಆ ಹುಲಿ ಪಟ್ಟೆಗೆ ಹಾಕಿರುವ ಗಟ್ಟಿ ಬೇಲಿಯೇ ಸಾಕ್ಷಿ.. !

 ವಯ್ಯಾರದಿಂದ ನಿಮ್ಮನ್ನು ಆಕರ್ಷಿಸೋಕೆ ಆಗೋಲ್ಲ ಅಂತ ಗೊತ್ತು.. ನಿಮ್ಮ ಪ್ರೀತಿ ಹಸಿರಿನ ಹಾಗೆ.. ಉಸಿರು ಸೇರಿದಾಗ ಮಾತ್ರ ನಳನಳಿಸೋದು.. ನಿಮಗೆ ಬಿಳಿ ಬಣ್ಣ ಇಷ್ಟ .. ಅದಕ್ಕೆ ಆ ಹಸಿರಾದ ಪ್ರೀತಿಗೆ ಬಿಳಿಯ ಸಂಕೋಲೆ ಹಾಕಿದ್ದೇನೆ.. !

 ನನಗೆ ಗೊತ್ತು.. ಮೇಲಿನ ರಂಗೋಲಿಗಳನ್ನು ನೋಡಿದ ಮೇಲೆ.. ನಿಮ್ಮ ಮನಸ್ಸಿಗೆ ಅನುಮಾನ ಶುರುವಾಗಿರುತ್ತೆ... ಯಾರಪ್ಪ ಇವಳು. ಹೀಗೆ ಕಾಡುತ್ತಿದ್ದಾಳೆ ಅಂತ.. ಅದಕ್ಕೆ ಬೂದು ಬಣ್ಣ ಉಪಯೋಗಿಸಿದ್ದೇನೆ.. ಆದರೆ ರಾಜೀವ ನೀವು ನನ್ನ ಜೀವ ಕಣ್ರೀ ಅದಕ್ಕೆ ಗೆರೆಗಳು ಇವೆ. ಅಂಕುಡೊಂಕಾದ ಗೆರೆಗಳು ಇವೆ.. ಇದು ನಿನಗೆ ಹೇಗೆ ಬೇಕೋ ಹಾಗೆ ನಾ ಬದಲಾಗುತ್ತೇನೆ ಎನ್ನುವುದು ತೋರಿಸುತ್ತದೆ.. !!!

ಆಹಾ ಕಳ್ಳ.. ಮೇಲಿನ ವಿವರಣೆ ಓದಿದ ತಕ್ಷಣ.. ಮುಖ ನೋಡಿ ಕೆಂಪಾಯಿತು.. ರಾಜೀವ ನಿಮ್ಮನ್ನು ಸದಾ ನಗು ನಗುತ್ತಾ ಇರುವಂತೆ ನೋಡಿಕೊಳ್ಳುವುದೇ ನನ್ನ ಉದ್ದೇಶ.. ಹಸಿರಾದ ಪ್ರೀತಿ ನಿಮ್ಮ ನಾಚಿಕೆಯಿಂದ ಕೆಂಪಾದ ಮೊರೆಯನ್ನು ಕಾಪಾಡುತ್ತದೆ.. ಎಂಗೆ.. !


ನಿಮ್ಮ ಕಣ್ಣುಗಳು ಬಾಗಿದೆ.. ಹೃದಯ ಮಿಡಿಯುತ್ತಿದೆ.. ನಿಮ್ಮ ಕಣ್ಣುಗಳಲ್ಲಿ ಹೊಳಪನ್ನು ಕಾಣುತ್ತಿದ್ದೇನೆ.. ಮಳೆಬಂದಾಗ ಗರಿ ಬಿಚ್ಚಿ ಹಾಡುವ ನವಿಲಿನಂತೆ ನನ್ನ ಮನಸ್ಸಾಗಿದೆ.. ಹಾರಲೇ.. ಕುಣಿಯಲೇ.. ನಲ್ಲ ನಿನಗಾಗಿ ನಾ ಇರುವೆ.. !!!


ನಿನ್ನ ಒಪ್ಪಿಗೆ ಸಿಕ್ಕಿದ್ದು ನನಗೆ ಖುಷಿಯಾಗುತ್ತಿದೆ.. ಅದಕ್ಕೆ ಮೆಟ್ಟಿಲುಗಳ ಸೋಪಾನ ಮಾಡಿದ್ದೇನೆ.. ಈ ಪ್ರೀತಿಯ ವೃತ್ತದಲ್ಲಿ ಒಂದೊಂದೇ ಮೆಟ್ಟಿಲನ್ನು ಏರಿ ಬನ್ನಿ.. ಜೊತೆಯಾಗೋಣ.. ಜೊತೆ ಹಾಡೋಣ.. !!!


 ನನಗಾಗಿ ನಾ ಏನೂ ಕೇಳಿಕೊಳ್ಳುವುದಿಲ್ಲ.. ಆದರೆ ನನಗೆ ಮೂಗಿನ ನತ್ತು ಎಂದರೆ ಬಹಳ ಇಷ್ಟ.. ಅದರಲ್ಲೂ ಸುಮ್ನೆ..  ಹರಳಿನ ಮೂಗುತಿ ಹಾಕಿಕೊಳ್ಳುವುದಕ್ಕಿಂತ ರಿಂಗ್ ಹಾಕಿಕೊಳ್ಳೋದು ಇಷ್ಟ.. ನಿಮಗೂ ಇಷ್ಟ ಅಂತ ಗೊತ್ತು .. ಕೊಡಿಸ್ತೀರಾ ಆಲ್ವಾ.. !!!

ನಿಮ್ಮ ಮನದಲ್ಲಿ ಹಾಡುತ್ತಿರುವ ಹಾಡು ಹೇಳಲೇ.. "ಆನೆಯ ಮೇಲೆ ಅಂಬಾರಿ ಕಂಡೆ.. ಅಂಬಾರಿ ಒಳಗೆ ನಿನ್ನನ್ನೇ ಕಂಡೆ.. ನನ್ನೇ ನಾ ಕಂಡೇ.. ಪಕ್ಕದಲ್ಲಿ ನನ್ನೇ ನಾ ಕಂಡೆ.. !!! ಬಾರೋ ರಾಜೀವ ನೀನೆ ರಾಜ.. ನಾನೇ ರಾಣಿ.. ಈ ಜಗತ್ತೇ ನಮ್ಮ ರಾಜ್ಯ.. ಆಳೋಣ.. ಅರಳೋಣ.. ಬೆಳೆಯೋಣ.. ಪ್ರೀತಿಯಲ್ಲಿ ಮೀಯೋಣ !!!


 ರಾಜೀವ ನಿಮ್ಮ ತಲೆ ಗರ ಗರ ತಿರುಗುತ್ತಿದೆಯೇ.. ಖಂಡಿತ ಬೇಡ.. ನೋಡಿ ಇದು ಬರಿ ಚಕ್ರವಲ್ಲ ..ನಮ್ಮ ಜೀವನ ಚಕ್ರ.. ತಿರುಗುತ್ತ ತಿರುಗುತ್ತ ಎಲ್ಲ ಬಣ್ಣಗಳು ಒಂದಾಗಿ ಬಿಳಿಯ ಬಣ್ಣವಾಗುತ್ತದೆ.. ಏಳು ಸ್ವರವು ಸೇರಿ ಸಂಗೀತವಾಯಿತು.. ಏಳು ಬಣ್ಣ ಸೇರಿ ಬಿಳಿಯ ಬಣ್ಣವಾಯಿತು ಅಂತ ಹಾಡಿಲ್ಲವೇ.. ಹಾಗೆ ಹತ್ತು ರಂಗೋಲಿ ಸೇರಿ ನಮ್ಮ ಜೀವನವಾಯಿತು.. ಹತ್ತು ಚಿತ್ರಗಳು ನನ್ನ ಪ್ರೇಮ ಪಾತ್ರವಾಯಿತು .. ಐ ಲವ್ ಯು ರಾಜೀವ.. !!!

 ರಾಜೀವನ ಮೊಗದಲ್ಲಿ ನಗು, ಸಂತೋಷ.. "ಹುರ್ರೆ ಹುರ್ರೇ ಹುರ್ರೇ" ತಾನು ಕೂತಿದ್ದು ಬೇರೆಯವರ ಆಫೀಸಿನಲ್ಲಿ ಎನ್ನುವುದನ್ನು ಮರೆತು ತುಸು ಜೋರಾಗಿಯೇ ಕೂಗಿದ..

ಮೃಣಾಲಿನಿ ಏನಾಯಿತು ಎಂದು ತನ್ನ ಕ್ಯಾಬಿನ್ ಇಂದ ಹೊರಗೆ ಬಂದು ನೋಡಿದರೆ.. ರಾಜೀವ ಸಂತಸದಲ್ಲಿದ್ದಾನೆ.. ಹತ್ತಿರ ಬಂದು.. ರಾಜೀವನ ಬೆನ್ನು ತಟ್ಟಿ ಮೆಲ್ಲನೆ ಮೆಲ್ಲನೆ ಎನ್ನುವ ಸನ್ನೆ ಮಾಡಿ.. ಅವನ ಕೈಕುಲುಕಿ.. "ಅಲ್ ದಿ ಬೆಸ್ಟ್ ರಾಜೀವ್.. ನಿಮ್ಮ ಪ್ರಿಯತಮೆಗೆ ನನ್ನ ಶುಭಾಶಯ ತಿಳಿಸಿ.. "  

ಮೇಡಂ.. ಇದನ್ನು ಹೇಗೆ ಡಿಕೋಡ್ ಮಾಡಿದಿರಿ ಹೇಳ್ತೀರಾ ಪ್ಲೀಸ್.. ನನಗೆ ಬಂದ ಲಕೋಟೆಯ ಮೇಲೆ ಕಳಿಸಿದವರ ವಿಳಾಸವಿಲ್ಲ.. ಫೋನ್ ಇಲ್ಲ .. ಹ್ಯಾಂಡ್ ಡೆಲಿವೆರಿ ಮಾಡಿದ್ದಾರೆ.. ಹಾಗಾಗಿ ಯಾರು ಬಂದಿದ್ದಾರೆ ಎನ್ನುವುದನ್ನು ಸಿಸಿಟಿವಿ ಯಲ್ಲಿ ನೋಡಿದೆ.. ಆದರೆ ನಮ್ಮ ಇಡೀ ಕಟ್ಟಡಕ್ಕೆ ಪೇಪರ್ ಹಾಕುವಾಗ ಪೇಪರ್ ಜೊತೆ ಇದು ಬಂದಿದೆ. .ಹಾಗಾಗಿ ಖಚಿತವಾಗಿ ಇವರೇ ಅಂತ ಹೇಳೋಕೆ ಆಗೋಲ್ಲ.. ಪೇಪರ್ ಏಜೆಂಟ್ ಹತ್ರ ವಿಚಾರಿಸಿದೆ.. ಅವ ಹೇಳಿದ್ದು ಸಾರ್ ನಮಗೆ ಸಾವಿರ ಪಾಂಪ್ಲೆಟ್ ಹಾಕಿದರೆ ಇಷ್ಟು ದುಡ್ಡು ಅಂತ ಹೇಳುತ್ತಾರೆ.. ಕೆಲವೊಮ್ಮೆ ಪೇಪರ್ ಹಾಕುವ ಹುಡುಗರನ್ನು ಅಡ್ಜಸ್ಟ್ ಮಾಡಿಕೊಂಡು ಹಾಕಿಸುತ್ತಾರೆ.. ಹಾಗಾಗಿ ಇವರೇ ಅಂತ ಹೇಳೋಕೆ ಆಗೋಲ್ಲ ಸರ್ ಎಂದು ಹೇಳಿ ಕೈ ತೊಳೆದುಕೊಂಡ.. ಪ್ಲೀಸ್ ಹೇಳಿ.. "

ಮೃಣಾಲಿನಿ ಒಂದು ಸುಂದರ ನಗೆ ಬೀರಿ.. "ಅದೆಲ್ಲ ಬಿಡಿ.. ಈ ರಂಗೋಲಿ ನೋಡಿ ನನ್ನ ಮನದಲ್ಲಿ ಏನೋ ಹೊಳೆಯಿತು.. ಗೂಗಲ್ ಹುಡುಕಿದೆ . .ಯಾವ ಯಾವ ಬಣ್ಣ ಯಾವುದಕ್ಕೆ ಅಂತ ತಿಳಿಯಬೇಕಿತ್ತು.. ಅದು ಗೊತ್ತಾದ ಮೇಲೆ. ಪ್ರತಿದಿನವೂ ಈ ರಂಗೋಲಿಯ ವಿನ್ಯಾಸವನ್ನು ಅರ್ಥ ಮಾಡಿಕೊಳ್ಳತೊಡಗಿದೆ.. ರಂಗೋಲಿಯ ಆಕಾರ, ಬಣ್ಣ, ವಿನ್ಯಾಸ ಬದಲಾಗುತ್ತಲೇ ಹೋಗಿದ್ದು ಅರಿವಾಯಿತು.. ನನಗೆ ತೋಚಿದ ಎಲ್ಲಾ ವಿಚಾರವನ್ನು ಬರೆದಿಟ್ಟುಕೊಂಡು ಒಂದೊಂದೇ ಚಿತ್ರವನ್ನು ಅದರ ಕ್ರಮಾಂಕದ ಅನುಸಾರವಾಗಿ ಜೋಡಿಸಿಕೊಂಡೆ.. ವಿವರ ಸಿಕ್ಕಿತು.. "

"ಧನ್ಯವಾದಗಳು ಮೇಡಂ.. ನಿಮ್ಮಿಂದ ನನ್ನ ಭುಜದ ಮೇಲಿದ್ದ ಒಂದು ಹೊರೆ ಕಡಿಮೆಯಾಯಿತು.. ಧನ್ಯವಾದಗಳು ಮದುವೆಗೆ ಖಂಡಿತ ನೀವು ಬರಲೇ ಬೇಕು.. ".

ಇದೇನ್ರಿ. ಆಕೆ ನಿಮಗೆ ಬರಿ ಪ್ರೇಮ ಪಾತ್ರ ಕೊಟ್ಟಿರೋದು ಅಷ್ಟೇ.. ಆಗಲೇ ಮದುವೆಯ ತನಕ ಹೋಗಿಬಿಟ್ಟಿದ್ದೀರಾ. ಶಭಾಷ್.. "

"ಮೇಡಂ. ಇಷ್ಟು ತಿಳುವಳಿಕೆಯುಳ್ಳ ಹುಡುಗಿ ನನ್ನ ಮನೆ ಮನ ತುಂಬಲು ಸರಿಯಾಗಿದ್ದಾಳೆ.. ಅವಳೇ ನನ್ನ ಹುಡುಗಿ.. " ಕಣ್ಣು ಮಿಟುಕಿಸಿ ಸರ ಸರ ಮೆಟ್ಟಿಲಿಳಿದು ಮರೆಯಾದ...

"ಕಿರಣ್.. ಈ ಕೇಸ್ ಆಯ್ತು.. ಅಕೌಂಟ್ ಕ್ಲೋಸ್ ಮಾಡಿ.. ಮುಂದಿನ ಕೇಸ್ ಆ ಪರ್ಪಲ್ ರೈನ್ ಕೋಟ್ ಅದನ್ನು ಓಪನ್ ಮಾಡು .. ಮುಂದಿನ ವಾರದೊಳಗೆ ಅದಕ್ಕೆ ಒಂದು ದಾರಿ ಕಾಣಿಸೋಣ.. " ಎನ್ನುತ್ತಾ "ಬಣ್ಣ ನನ್ನ ಒಲವಿನ ಬಣ್ಣ" ಹಾಡುತ್ತ ತನ್ನ ಕ್ಯಾಬಿನಿಗೆ ಹೋದರು.. !!!

ಇತ್ತ ರಾಜೀವ ತನ್ನ PPT ಪ್ರಿಯತಮೆಯನ್ನು ಊಟಕ್ಕೆ ಆಹ್ವಾನಿಸಿ.. ಆ ಹೋಟೆಲಿನ ಕಡೆಗೆ ಹೊರಟ!!!

                                                             **********

ನನ್ನ ಸಹೋದರ ಜ್ಞಾನೇಶನ ಮಡದಿ ಆಶಾ ಸರ್ಜಾ... ಇವರನ್ನು ನಾ ದೇವಿ ಎನ್ನುತ್ತೇನೆ... .ಕಾರಣ ಅವನ ಕಂಗಳಲ್ಲಿನ ಹೊಳಪು.. ಆಕೆಯ ಕೈ ಬೆರಳುಗಳಲ್ಲಿ ಅದೇನೋ ಜಾದು ಇದೆ.. ರಂಗೋಲಿ ಪುಡಿ ಆಕೆಯ ಮಾತಿಗೆ ನೆಲದ ಮೇಲೆ ನರ್ತಿಸುತ್ತವೆ. .. ನಗುತ್ತೀರಾ.. ನಗೋದು ಬೇಡವೇ ಬೇಡ.. ಆ ಮೇಲಿನ ರಂಗೋಲಿಗಳು ಆಕೆಯ ಸೃಷ್ಟಿಯೇ.. ದಸರಾಗೆ ಹತ್ತು ದಿನವೂ ವಿಭಿನ್ನ ಆಯಾಮದ ರಂಗೋಲಿ ಹಾಕಿದ್ದು ನೋಡಿ.. ಆಕೆಗೆ ಹೇಳಿದ್ದೆ "ದೇವಿ ನೀವು ಅನುಮತಿ ಕೊಟ್ಟರೆ.. ನಿಮ್ಮ ಹತ್ತು ದಿನದ ರಂಗೋಲಿ ವಿನ್ಯಾಸವನ್ನು ಇಟ್ಟುಕೊಂಡು ಒಂದು ಪ್ರೇಮಕತೆ ಮಾಡುತ್ತೇನೆ.. " ಗಾಬರಿಯಾಗಿದ್ದ ಆಕೆ. ."ಸರಿ ಬಾವ ಆಗಲಿ ಅದಕ್ಕೆ ಅನುಮತಿ ಯಾಕೆ.. ನನಗೂ ಕುತೂಹಲವಿದೆ  ಹೇಗೆ ಮೂಡುತ್ತವೆ" ಅಂತ ಹೇಳಿದ್ದರು..

ಆಶಾ ಸರ್ಜಾ & ಜ್ಞಾನೇಶ ಶುಭಾಶಯಗಳು!!!
ಇಂದು ಜ್ಞಾನೇಶ ಮತ್ತು ಆಶಾ ಅವರ ಹತ್ತನೆಯ ವಿವಾಹ ವಾರ್ಷಿಕೋತ್ಸವ.. ಈ ಸುಂದರ ದಿನಕ್ಕೆ ಶುಭಾಶಯಗಳು.. ನೀವು ಶುಭಾಶಯಗಳನ್ನೂ ಕೋರುತ್ತೀರಾ ಅಲ್ಲವೇ..!!! 

Friday, November 30, 2018

ಪ್ರತಿಭಾಮಯ ಶಶಿ

ನಮ್ಮದೊಂದು ಗುಂಪು.. ಸಮಾನಾಭಿರುಚಿ, ಸಮಾನ ಯೋಚನೆ.. ಊಹುಂ.. ಇಲ್ಲ.. ಎಲ್ಲರೂ ಬುದ್ದಿಯವಂತರೇ.. ಎಲ್ಲರೂ ಹೃದಯವಂತರೇ.. ಆದರೂ ಒಬ್ಬರ ಯೋಚನೆ ಇನ್ನೊಬ್ಬರ ತಲೆಗೆ ಬರೋಲ್ಲ.. ಆದರೂ ಕಳೆದ ಮೂರು ದಶಕಗಳಿಂದ ಜೊತೆ ಇದ್ದೀವಿ.. ನಮ್ಮಲ್ಲಿ ವೈಯುಕ್ತಿಕ ಎನ್ನುವ ಪದಕ್ಕೆ ಅರ್ಥವೇ ಗೊತ್ತಿಲ್ಲ.. ಎಲ್ಲರ ಬಗ್ಗೆ ಎಲ್ಲರಿಗೂ ಗೊತ್ತು.. ನಕರ ಮಾಡುವ ಪ್ರಶ್ನೆಯೇ ಇಲ್ಲ..

ಪೀಠಿಕೆ ಸಾಕು ಅಂತೀರಾ.. ಹಲವಾರು ವರ್ಷಗಳಿಂದ ಇದರ ಬಗ್ಗೆ ಬರೆಯುತ್ತಲೇ ಇದ್ದೇನೆ.. ಆದರೂ ಮುಗಿಯದ ಕಡಲು ಇದು..
ಶಶಿ, ಲೋಕಿ, ವೆಂಕಿ, ಜೆಎಂ ಮತ್ತು ಶ್ರೀ ಪಂಚ ಪಾಂಡವರು.. ವರ್ಷ ಪೂರ್ತಿ ನಮ್ಮದು, ನಮ್ಮ ಮಡದಿಯರದು, ಮಕ್ಕಳದು ಹುಟ್ಟು ಹಬ್ಬಗಳು ಇದ್ದೆ ಇರ್ತಾವೆ.. ಹಾಗಾಗಿ ಶುಭಾಶಯಗಳನ್ನ ಕೋರೋದು ನೆಡೆದೆ ಇರುತ್ತೆ. .

ವೆಂಕಿ ಅಕ್ಟೋಬರ್ ೧೮, ಜೆಎಂ,  ಮೇ ೧೩ ಹೀಗೆ ವಿವಾಹದಿನಗಳು ಬರುತ್ತವೆ.. ವಿಶ್ ಮಾಡುತ್ತೇನೆ..ದಿನಗಳು ಕಳೆಯುತ್ತವೆ.. ಆದರೆ ಈ ನವೆಂಬರ್ ಮೂವತ್ತು ಬಂದರೆ ಚಳಿ ಜ್ವರ ಬರುತ್ತೆ ನನಗೆ.. ಒಂದು ಬಾರಿ ೨೦೧೪ ರಲ್ಲಿ ಕೆಲಸದ ಒತ್ತಡಗಳಿಂದ ಮಿಸ್ ಮಾಡಿದ್ದಕ್ಕೆ ಒಂದು ವರ್ಷ ಬಹಿಷ್ಕಾರ ಹಾಕಿದ್ದರು ಅಕ್ಕಯ್ಯ ಪ್ರತಿಭಾ.. ಕಡೆಗೆ ನನ್ನ ಶೈಲಿಯಲ್ಲಿ ಪುಸಲಾಯಿಸಿ ಶರಣು ಅಂತ ಹೇಳಿ.. ಕಾಲಿಗೆ ಬಿದ್ದು ಕ್ಷಮಾಪಣೆ ಕೇಳಿದ ಮೇಲೆ ಮನ್ನಿಸಿದ್ದು.. ಅಂತಹ ಅದ್ಭುತ ಪ್ರೀತಿ ಇವರದ್ದು..

ಇವರ ಬಳಿ ಪ್ರಶ್ನೆಗಳ ರಾಶಿಯೇ ಇರುತ್ತದೆ.. ಇಪ್ಪತ್ತು ವರ್ಷಗಳಿಂದ ಕೇಳಿದ ಪ್ರಶ್ನೆ, ಹೇಳಿದ ಉತ್ತರ ಗೊತ್ತಿದ್ದರೂ ಮತ್ತೆ ಮತ್ತೆ ಭೇಟಿಯಾದಾಗೆಲ್ಲ ಅದೇ ರಿಪೀಟ್..

"ಟೊಮೇಟೊ ಯಾಕೆ ತಿನ್ನಲ್ಲ?"
"ಕಾಫಿ ಯಾಕೆ ಅಷ್ಟೊಂದು ಕುಡಿತೀರಾ?"
"ಯಾಕೆ ಕಾಫೀ ಕುಡಿಯಲ್ಲ?"

ಹೀಗೆ ಪ್ರಶ್ನಾವಳಿಗಳು ನೆಡೆಯುತ್ತಲೇ ಇರುತ್ತವೆ..

"ಅಕ್ಕಯ್ಯ ದೇಶದಲ್ಲಿ ನೂರಾರು ಸಮಸ್ಯೆಗಳಿವೆ..   ಭಾರತ ಮುನ್ನುಗ್ಗುತ್ತಿದೆ, ಮುಂದಿನ ಚುನಾವಣೆಯಲ್ಲಿ ಮೋದಿ ಗೆಲ್ಲಬೇಕು, ಕ್ರಿಕೆಟ್ ವಿಶ್ವಕಪ್ ಭಾರತ ಗೆಲ್ಲಬೇಕು.. ಇಂಧನದ ದರ ಕಡಿಮೆಯಾಗಬೇಕು.. ನಾನು" ಹೇಳುತ್ತಲೇ ಇರುತ್ತೇನೆ.. ಆದರೆ ಅವಾಗ
"ಅಣ್ಣ.. ಅದೆಲ್ಲ ನನಗೆ ಬೇಡದ ವಿಷಯ.. ಅದನ್ನು ನೋಡಿಕೊಳ್ಳೋಕೆ ಇದ್ದಾರೆ.. ನನ್ನ ಅಣ್ಣನ ಬಗ್ಗೆ ಕಾಳಜಿ ಮುಖ್ಯ.." ಎಂದು ಗದರಿಸುತ್ತಾರೆ..

ಇದು ಇವರ ವಿಷಯವಾದರೆ..

ಶ್ರೀಕಿ.. ಬರಿ ಕತೆ ಹೇಳ್ತೀಯ ನೀನು.. ವೆಂಕಿ ಮಾತಿನಲ್ಲಿ ನಂಬಿಕೆ ಇದೆ.. ನಿನ್ನ ಮೇಲೆ..#$$#$#.. ನಿನಗೆ ಅರ್ಥವಾಯಿತು ತಾನೇ..

ಅದೇನು ಬರೀತೀಯೋ.. ಅದಕ್ಕೆ ಅರ್ಥಗಳನ್ನು ನೀನೆ ಹೇಳಬೇಕು ಎನ್ನುತ್ತಾ.. ಇನ್ನಷ್ಟು ವಿಚಿತ್ರವಾಗಿ ಬರೆಯಲು ಪ್ರೇರೇಪಿಸುತ್ತಾನೆ..

ಶ್ರೀಕಿ.. ನೀ ನಿನ್ನ ಆರೋಗ್ಯದ ಬಗ್ಗೆ ಯೋಚನೆ ಮಾಡು.. ಹೊರಗಿನ ಬಗ್ಗೆ  ಯೋಚಿಸೋಕೆ ನಾವಿದ್ದೇವೆ ಎಂದು ನನಗೆ ಧೈರ್ಯ ತುಂಬುವ ಶಶಿ...

ಶ್ರೀಕಿ ನಿಂದು ನಿನ್ನ ಅಕ್ಕಯ್ಯನದು ಹೊಡೆದಾಟ ನಾ ಮಧ್ಯೆ ಬರೋಲ್ಲ.. ಏನಾದರೂ ಮಾಡಿಕೊಳ್ಳಿ ಎನ್ನುತ್ತಾ.. ತಟಸ್ಥವಾಗಿರುವ ಶಶಿ..

ಈ ಇಬ್ಬರು ಜೊತೆಯಾಗಿ ನನ್ನ ಮೇಲೆ ಅಭಿಮಾನ ತೋರಿಸುತ್ತಾ ಕಳೆದ ವರ್ಷಗಳು ೨೦... ಇಂದು ಒಂದಾದ ದಿನ.. ಎರಡು ದಶಕಗಳು ಕಳೆದದ್ದೇ ಅರಿವಾಗದೇ ಸಾಗಿದೆ.. ತಂದೆಯಂತೆಯೇ ಬುದ್ಧಿವಂತನಾದ ಮಗರಾಯ ವೈದ್ಯನಾಗುವತ್ತ ಹೆಜ್ಜೆ ಇಟ್ಟಿದ್ದಾನೆ.. ಮನೆಯ ಕೆಲಸದ ಜೊತೆಯಲ್ಲಿ ತಂದೆ ಮಗನ ಯೋಗಕ್ಷೇಮ ವಿಚಾರಿಸುತ್ತಾ.. ಪತಿಗೆ ತಕ್ಕ ಸತಿಯಾಗಿ ಜವಾಬ್ಧಾರಿ ಹಂಚಿಕೊಂಡು ಸಾಗುವ ಪ್ರತಿಭಾ.. ಇಬ್ಬರಿಗೂ ವಿವಾಹ ದಿನದ ಶುಭಾಶಯಗಳು..

ಶಶಿ ಪ್ರತಿಭಾ ಈ ಸಮಯ ಎರಡು ದಶಕ ಕಳೆದ ಸಮಯ.. ಸುಖ ಸಂತೋಷ ನೆಮ್ಮದಿ ಸದಾ ನಿಮದಾಗಿರಲಿ.. !!!

Sunday, May 6, 2018

ಕಾಯಕವೇ ಕೈಲಾಸ .. DFR

ಗೆಳೆತನ ಮಾಡಿಕೊಂಡರೆ ಅದು ಉಸಿರಿರುವರೆಗೆ.. ಇಲ್ಲವೇ ಗೆಳೆತನದ ಉಸಿರು ತೆಗೆಯುವವರೆಗೆ ಎನ್ನುವ ಸಿದ್ಧಾಂತ ನನ್ನದು.. ಆದರೆ ಕೆಲವರು ಇರುತ್ತಾರೆ.. ಅವರ ಗೆಳೆತನದ ಹಸಿರಾದ ಗಿಡಕ್ಕೆ ಹೆಸರು, ಹಸಿರು, ಉಸಿರು ಯಾವುದು ಬೇಕಿಲ್ಲ.. ಇದೆ ಯೋಚನೆಯಲ್ಲಿ ರಾತ್ರಿ ಮಲಗಿದೆ.. ದ. ರಾ. .ಬೇಂದ್ರೆಯಜ್ಜನ ಕವನದಂತೆ ನಿದ್ದೆ ಮಾಡಿದರೆ ಮುಗೀತು.. ಮರುದಿನ ಬೆಳಿಗ್ಗೆಯೇ ಎಚ್ಚರ ನನಗೆ..

ಅಮೃತ ಘಳಿಗೆ .. ಸುವರ್ಣ ಸಮಯ.. ಚಿನ್ನದಂಥ ಕಾಲ ..ಹೀಗೆ ಅನೇಕ ರೀತಿಯಲ್ಲಿ ಹೇಳುವ ಬೆಳಗಿನ ಜಾವ ೩ ರಿಂದ ೫ರ ತನಕ ನನಗೆ ಬೀಳುವ ಕನಸುಗಳು. ... ಬರುವ ಯೋಚನೆಗಳು.. ಯೋಜನೆಗಳು ನೂರಕ್ಕೆ ೯೮ ಭಾಗ ನಿಜವಾಗುತ್ತದೆ.. ಉಳಿದ ಎರಡು ಭಾಗ.. ಬಿಡಿ ಅದರ ಬಗ್ಗೆ ಬೇಡ..

ಐರಾವತದ ಮೇಲೆ ಇಂದ್ರ ಬರುತ್ತಿದ್ದ.. ಪಕ್ಕದಲ್ಲಿ ಅಷ್ಟ ದಿಕ್ಪಾಲಕರು ತಮ್ಮ ತಮ್ಮ ವಾಹನಗಳಲ್ಲಿ ಬರುತ್ತಿದ್ದರು.. ಎಲ್ಲರ ಹಣೆಯ ಮೇಲೆ ಗೆರೆಗಳು.. ಹಾಗೂ ಎಲ್ಲರ  ಹಣೆಯ ಮೇಲೆ ಚಿಂತೆಯ ಮೋಡಗಳು.. ಇಂದ್ರನ ಐರಾವತ ತನ್ನ ಸೊಂಡಿಲನ್ನು ಅತ್ತಿತ್ತ ಬೀಸುತ್ತಾ.. ಕಾಮಧೇನುವಿಗೆ ಏನೋ ಸನ್ನೆ ಮಾಡುತ್ತಿತ್ತು.. ಕಾಮಧೇನು   ತಲೆಯಲ್ಲಾಡಿಸುತ್ತಿತ್ತು..

ಸಭೆಗೆ ಬಂದಾಗ.. ಸಪ್ತ ಋಷಿಗಳು ಎಲ್ಲರಿಗೂ ಆಶೀರ್ವಾದ ನೀಡಿದರು.. ಹಾಗೆ ನೋಡುತ್ತಾ.. ಎಲ್ಲರ ಹಣೆಯ ಮೇಲಿನ ಗೆರೆಗಳ ಮಧ್ಯೆ ಸಿಕ್ಕಿದ್ದ ಯೋಚನೆಗಳ ಸುಳಿವು ಸಿಕ್ಕಿತು.. ಇಂದ್ರನಿಗೆ ಕಣ್ಣಲ್ಲಿಯೇ ಸನ್ನೆ ಮಾಡಿ.. ತಮ್ಮ ತಮ್ಮ ಸ್ಥಾನದಲ್ಲಿ ಕೂರಲು ಹೇಳಿ ಎಂದರು..

ಇಂದ್ರ ಐರಾವತದಿಂದ ಇಳಿದು.. ಎಲ್ಲರೂ ತಮ್ಮ ತಮ್ಮ ಸ್ಥಾನದಲ್ಲಿ ವಿರಾಜಿಸಲು ಹೇಳಿದ..

ಎಲ್ಲರಿಗೂ ಮನದಲ್ಲಿಯೇ ತಳಮಳ. .ನಮ್ಮ ಸಮಸ್ಯೆಯನ್ನು ಕೇಳದೆ ಹೇಗೆ ಬಗೆ ಹರಿಸುತ್ತಾರೇ ಎಂದು..

ಹಿರಿಯರಾದ ದೇವರ್ಷಿ ವಸಿಷ್ಠರು "ನೋಡು ಇಂದ್ರ.. ನಿನ್ನ ಸಮಸ್ಯೆ ಅರ್ಥವಾಯಿತು.. ಸುತ್ತಿ ಬಳಸಿ ಹೇಳದೆ ನೇರವಾಗಿ ಹೇಳುತ್ತೇನೆ.. ಸದಾ ಚಟುವಟಿಕೆಯಲ್ಲಿ ನಿರತವಾಗಿರುತ್ತಾರೆ.. ಸಮಾಜಮುಖಿಯಾಗಿ ಹಲವಾರು ಕಾರ್ಯಗಳಲ್ಲಿ ತಮ್ಮನ್ನು ತೊಡಗಿಸಿಕೊಳ್ಳುತ್ತಾ.. ಅನೇಕ .. ಏ ಎಂಥ ಮಾತು.. ಅನೇಕ ಅಲ್ಲವೇ ಅಲ್ಲ ನೂರಾರು ಸ್ನೇಹಿತರಿಗೆ ಮಾದರಿಯಾಗಿ.. ಹತ್ತಾರು ತಂಗಿಯರಿಗೆ ಅಕ್ಕನಾಗಿ.. ಹತ್ತಾರು ತಮ್ಮಂದಿರಿಗೆ ಅಕ್ಕನಾಗಿ.. ಹಲವರಿಗೆ ದೇವರು ಕಳಿಸಿದ ಸ್ನೇಹಿತೆಯಾಗಿ ನಿಂತಿದ್ದರೂ.. ಅಹಂ ಅನ್ನುವ ಪದವೇ ಅವರ ವಿಳಾಸ ಸಿಗದೇ.. ಮೈಸೂರು ರಸ್ತೆಯಲ್ಲಿ ಎಲ್ಲೊ ಕಳೆದುಹೋಗಿದೆ.. ಅವರನ್ನು ಸುಮ್ಮನೆ ಹತ್ತು ನಿಮಿಷ ಏನೂ ಕೆಲಸ ಮಾಡದೆ ಕೂರಿಸಿಬಿಟ್ಟರೆ.. ಚತುರ್ಮುಖ ಬ್ರಹ್ಮ ಗಾಬರಿಯಾಗುತ್ತಾನೆ.. ತನ್ನ ಸೃಷ್ಟಿಯಲ್ಲಿ ಏನೋ ತೊಂದರೆಯಾಗಿದೆ ಅನಿಸುತ್ತದೆ..   ಕೈಲಾಸವಾಸಿ ಮಹಾದೇವ.. ಆ  ಮಂಜಿನ ಗಿರಿಯಲ್ಲಿದ್ದರೂ ಸಣ್ಣಗೆ ಬೆವರುತ್ತಾನೆ .. ಕ್ಷೀರಸಾಗರದಿ ಸದಾ ಶಾಂತವಾಗಿರುವ ಶ್ರೀಮನ್ ಮಹಾವಿಷ್ಣು.. ಕೊಂಚ ವಿಚಲಿತನಾಗುತ್ತಾನೆ.. ಅವರ  ಮಂತ್ರ ಒಂದೇ.. "ಜಗಕೆ ಮುಕ್ಕೋಟಿ ದೇವರಿದ್ದರೂ ನೀ ನನ್ನ ದೇವರು" ಎನ್ನುತ್ತಾ ತಾಯಿಯನ್ನೇ ದೇವರು ಎನ್ನುತ್ತಾ.. ತಾಯಿ ಸುಖದ ಮುಂದೆ ಮಿಕ್ಕಿದ್ದೆಲ್ಲ ತೃಣ ಸಮಾನ ಎನ್ನುವ ಇವರ ಗೆಳೆಯರ ಬಳಗ ನೋಡಿದರೆ.. ಕೇಳಿದರೆ.. ಅಬ್ಬಬ್ಬಾ ಎನ್ನಿಸುತ್ತದೆ.. "

ಸ್ವಲ್ಪ ಸುಧಾರಿಸಿಕೊಂಡು.. ಕಮಂಡಲದಲ್ಲಿದ ತೀರ್ಥವನ್ನು ಕೊಂಚ ಕುಡಿದು.. "ನೋಡಪ್ಪಾ ಇಂದ್ರ.. ಇವರಿಗೆ ಕಾಫೀ ಬಲು ಪ್ರಿಯ.. ಸೆಲ್ಫಿ ಚಿತ್ರಗಳು ಕಡಿಮೆ ಆದರೆ ಇವರ ಗೆಳೆಯರ ಬಳಗ ತೆಗೆಯುವ ಚಿತ್ರಗಳು ಒಂದು ವ್ಯಕ್ತಿತ್ವವನ್ನು ಹೊರಹೊಮ್ಮಿಸುತ್ತದೆ... ಇವರ ಚಿತ್ರಗಳಿಗೆ ನೂರಾರು ಪ್ರತಿಕ್ರಿಯೆ ಬರುತ್ತದೆ.. ಎಲ್ಲವನ್ನು ಸಮಾಧಾನ ಚಿತ್ತದಿ ಸ್ವೀಕರಿಸಿ ಉತ್ತರಿಸಿ.. ಮತ್ತೆ ಭೂರಮೆಯ ಹಸಿರಿನ ಐಸಿರಿಯನ್ನು ತಮ್ಮ ಖಾತೆಗೆ ಲಗತ್ತಿಸಿ.. ಭೂತಾಯಿಗೆ ನಮಿಸುತ್ತಾರೆ..
ಭಕ್ತರು ದೇವರನ್ನು ಕುರಿತು ತಪಸ್ಸು ಮಾಡಿ.. ದೇವರು ಪ್ರತ್ಯಕ್ಷವಾದಾಗ.. ದೇವರು ಹೇಳುತ್ತಾರೆ ..ಅಮೃತ ಘಳಿಗೆಯಲ್ಲಿಯೇ ಉತ್ತರಿಸಬೇಕು.. ಹಾಗಾಗಿ.. ಇವರ ಅನೇಕ ಸ್ನೇಹಿತರು.. ಕ್ಷಣಗಳ ಲೆಕ್ಕದಲ್ಲಿ ಮಾತಾಡುತ್ತಾರೆ.. ಮತ್ತೆ ಇವರ ಹೆಗಲ ಮೇಲೆ ಯಾವಾಗಲೂ ಒಂದು ಭಾರವಿದ್ದೇ ಇರುತ್ತದೆ.. "

ತಕ್ಷಣ ಎಲ್ಲರೂ ಒಮ್ಮೆಲೇ.. "ಮಹರ್ಷಿಗಳೇ.. ಹೆಗಲ ಮೇಲೆ ಭಾರವೇ.. ?"

"ಹೌದಪ್ಪ.. ಭಾರವೇ.. ಇವರು ಎಲ್ಲರ ಬಳಿ ಮಾತಾಡಬೇಕು ..ಎಲ್ಲರಿಗೂ ಸಮಯ ಕೊಡಬೇಕು.. ಎಲ್ಲಾ ಸಮಯದಲ್ಲಿಯೂ ಸಿಗಬೇಕು ಎನ್ನುವ  ಪ್ರೀತಿಯ ಒತ್ತಡ.. ಆದರೆ.. ಇವರು ಇದನ್ನು ಒತ್ತಡ ಅಂದುಕೊಳ್ಳದೆ.. ಅದನ್ನು ಒಂದು ಕಾರ್ಯ ಎನ್ನುತ್ತಾ.. ಎಲ್ಲರಿಗೂ ಇವರು ಸಮಯ ಕೊಡುವುದನ್ನು ಕಂಡು.. ಅಷ್ಟ ದಿಕ್ಪಾಲಕರೇ ಹಲವು ಬಾರಿ ಗಾಬರಿಗೊಂಡಿದ್ದಾರೆ.. .. ಆದರೆ ಆದರೆ..ಬ್ರಹ್ಮ ದೇವನು.. ಮಹಾದೇವನು.. ಮಹಾವಿಷ್ಣುವೂ ತನ್ನ ಭಕ್ತರನ್ನು ಪೊರೆವಂತೆ.. ಇವರು ತಮ್ಮ ಸ್ನೇಹವಲಯದಲ್ಲಿ ಎಲ್ಲರಿಗೂ ಇಷ್ಟವಾಗುವ ಹಾಗೆ ಇರುತ್ತಾರೆ.. "

ದೇವರ್ಷಿ ವಸಿಷ್ಠರು.. ಇಷ್ಟು ಹೇಳಿ ಇನ್ನೊಮ್ಮೆ ತೀರ್ಥ ಸೇವಿಸಿ.. ಆಸೀನರಾದರು..

ಎಲ್ಲರ ಹಣೆಯ ಮೇಲೆ ಇದ್ದ ಸುಕ್ಕುಗಳು ರವಿಯ ಕಿರಣಗಳಿಗೆ ಮಾಯವಾಗುವ ಮಂಜಿನ ಹನಿಯಂತೆ ಮಾಯವಾಯಿತು..

ಐರಾವತ ಮತ್ತು ಕಾಮಧೇನು ಸಭೆಯ ಮಧ್ಯಕ್ಕೆ ಬಂದು ನಿಂತವು..

ಇಂದ್ರನಿಗೆ ಅರ್ಥವಾಯಿತು... ದೇವರ್ಷಿ ವಸಿಷ್ಠರು ಕಣ್ಣಿನ ಸನ್ನೆಯಲ್ಲಿ ಹೇಳು ಎಂದು ಸೂಚನೆ ಕೊಟ್ಟರು..

ಐರಾವತ "ಇವರ ಹೆಸರು ಶ್ರೀ ಕರೆಯುವಂತೆ DFR .. ನನ್ನಷ್ಟೇ ನೆನಪಿನ ಶಕ್ತಿ ಹೆಚ್ಚು ಮತ್ತೆ ನನ್ನ ಹಾಗೆ ನೆಡೆದದ್ದೇ ಹಾದಿ.. ಎಲ್ಲರೂ ತುಳಿಯುವ ಹಾದಿಯನ್ನು ಇವರು ತುಳಿಯುವುದಿಲ್ಲ.. ಹಾಗಾಗಿ ನನಗೆ ಇವರೆಂದರೆ ಅತಿ ಗೌರವ"


ಬಿಳಿಮುಗಿಲಿನಂತೆ ಶ್ವೇತ ವರ್ಣಕ್ಕೆ ಇನ್ನೊಂದು ಹೆಸರಾಗಿದ್ದ ಕಾಮಧೇನು  "ನಾ ಕೇಳಿದ್ದನ್ನು ಕೊಡುವ ಕಾಮಧೇನು ಅನ್ನುತ್ತಾರೆ.. ಇವರೂ ಕೂಡ ಹಾಗೆ.. ಇವರ ಹತ್ತಿರ  ಇಲ್ಲ ಎನ್ನುವ ಮಾತೆ ಇರೋಲ್ಲಾ.. ಅದಕ್ಕೆ ಇವರನ್ನು ಕಂಡರೆ ನನ್ನನ್ನೇ ಕಂಡಂತೆ ಆಗುತ್ತದೆ.. "

ಇಂದ್ರ ಎದ್ದು ನಿಂತು.. "ಮಹಾಜನತೆಗಳೇ.. .. ನಮಗೆಲ್ಲಾ ತವಕ ಇದ್ದಿದ್ದು.. ಇಷ್ಟೆಲ್ಲಾ ಹೆಸರು ಗಳಿಸಿಯೂ ಕೂಡ ಅಹಂ ತಲೆಗೇರಿಲ್ಲ ಮತ್ತು ಎಲ್ಲರ ಮನಸ್ಸಿಗೂ ಹತ್ತಿರವಾಗಿರುವ ಇವರ ಬಗ್ಗೆ ಭುವಿಯಲ್ಲಿ ಹರಡಿರುವ ಖ್ಯಾತಿಯ ವಿಚಾರ ನಮಗೆ ತಿಳಿದುಬಂದಿದ್ದರಿಂದ ಇವರ ಬಗ್ಗೆ ತಿಳಿಯಬೇಕು ಎನ್ನುವ ನಮ್ಮ ಪ್ರಶ್ನೆಗಳಿಗೆ ಗುರುಗಳಾದ ದೇವರ್ಷಿ ವಸಿಷ್ಠರು ಪರಿಪೂರ್ಣ ಮಾಹಿತಿ ನೀಡಿದ್ದಾರೆ.. ಹಾಗಾಗಿ ಅವರಿಗೆ ವಂದನೆಗಳು.. ಜೊತೆಯಲ್ಲಿ ಇಂದು  DFR ಅವರ ಜನುಮದಿನ.. ಈ ಲೇಖನ ನೋಡಿದ ಮೇಲೆ ಅವರು ಈ ಕೆಳಗಿನ ರೀತಿಯಲ್ಲಿ ಪ್ರತಿಕ್ರಿಯೆ ನೀಡುತ್ತಾರೆ

೧) ನನ್ನ ದಿನದಲ್ಲಿ ಅಳಿಸುವ ನಿಮಗೆ  ಏನು ಹೇಳಲಿ
೨) ನಿಮ್ಮೆಲ್ಲರ ಅಭಿಮಾನಕ್ಕೆ ಧನ್ಯವಾದಗಳು
೩) ನನ್ನ ಜನುಮ ಸಾರ್ಥಕ ಎನ್ನುವಂತಹ ಭಾವ ನನಗೆ
೪) ಎಲ್ಲರಿಗೂ ಧನ್ಯವಾದಗಳು

ಇಷ್ಟು ಹೇಳಿ ಸುಮ್ಮನಾಗುತ್ತಾರೆ.. ಮತ್ತೆ ಕಣ್ಣಂಚಿನಲ್ಲಿ ಧುಮುಕುವ ಜೋಗದ ಹಿನ್ನೀರಿಗೆ ಆಣೆಕಟ್ಟು ಕಟ್ಟಿ ಧನ್ಯತಾ ಭಾವದಿಂದ ಕೈಮುಗಿದು ಹೇಳುತ್ತಾರೆ

"ಎಂದರೋ ಮಹಾನುಭಾವುಲು ಅಂದರೇಕಿ ವಂದನಮು"